ކަސްޓަމްސްގެ އޮފިސަރުންތަކެއްގެ އެކައުންޓްތަކުން 400 މިލިއަނެއްހާ ރުފިޔާގެ ފައިސާ ދައުރުވެފައިވާ މައްސަލައެއްގެ ތަހުގީގު ފުލުހުންގެ މުވައްސަސާއިން ފަށައިފިއެވެ.
މި މައްސަލައިގެ މައުލޫމާތަށް ބަލާއިރު، 20 ވަރަކަށް ކަސްޓަމްސް އޮފިސަރުން މި ފައިސާ ހޯދާފައިވަނީ ޑިއުޓީ އޮޅުވާލުމާއި ކަސްޓަމްސްގެ އެހެނިހެން ހިދުމަތްތަކުގެ ތެރެއިންނެވެ. މި މައްސަލަ ބެލުމުގައި ފުލުހުންގެ އިތުރުން ރައްޔިތުންގެ މަޖިލީހުގެ 241 ކޮމިޓީންވެސް ދަނީ މަސައްކަތްތަކެއް ކުރަމުންނެވެ. މި ގޮތުން ކޮމިޓީން ވަނީ ސިއްރު ބައްދަލުވުންތަކެއް ބާއްވައި، ސަރުކާރުގެ ކަމާގުޅޭ އިދާރާތަކުގެ އިސްވެރިންނާ ސުވާލުކޮށްފައެވެ.
މީގެ ކުރިން މިދިޔަ ޑިސެމްބަރު މަހު ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެފައިވަނީ ޔުނިފޯމް އަޅައިގެން ތިބޭ މުއައްސަސާތަކާ މެދު އިތުބާރު ކުރެވޭ ހާލަތެއްގައި ނޫން ކަމަށެވެ. އަދި 241 ކޮމިޓީން ބަލަމުންދާ މައްސަލަތައް ނިމުމުން، މަސްތުވާތަކެތީގެ މައްސަލަ ފަދަ ކަންކަމަށްވެސް ހައްލުތަކެއް ހުށަހަޅާނެ ކަމަށް އޭނާ ވިދާޅުވިއެވެ.
ނާޒިމް އިތުރަށް ފާހަގަކުރެއްވި ގޮތުގައި ރާއްޖޭގެ ބޯޑަރު ހުރަސްކޮށް މަސްތުވާތަކެތި އެތެރެ ނުވާނެކަމުގެ ޔަގީންކަން ރައްޔިތުންނަށް ދިނުމަކީ މަޖިލީހުގެ މެންބަރުންގެ ޒިންމާއެކެވެ. އަދި މިހާތަނަށް ޔުނިފޯމް އަޅައިގެން ތިބޭ މުއައްސަސާތަކުން މިކަން ކަށަވަރުކުރުމުގައި ވަރަށް ބޮޑަށް އިހުމާލުވެފައިވާ ކަމަށްވެސް އޭނާ ވިދާޅުވިއެވެ.
ކަސްޓަމްސްގެ އޮފިސަރުންގެ މި ހިޔާނާތުގެ މައްސަލަ ފެންމަތިވެފައިވާއިރު، ކަސްޓަމްސްގެ އޮފިސަރުން ބައިވެރިވެގެން ގަވާއިދާ ހިލާފަށް ރާއްޖެއަށް އެކި ބާވަތުގެ ތަކެތި އެތެރެކުރާ ކަމުގެ ތުހުމަތު އަބަދުވެސް އޮވެއެވެ.
