އިތުރު ޑްރެޖަރުތަކެއް ގެނެސްގެން ރަސްމާލެ ހިއްކުމުގެ މަސައްކަތް އަވަސްކުރުމަށް ހަމަޖެހިފައިވާކަން ރައީސް މުއިއްޒު ހާމަކުރައްވައިފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިކަން ހާމަކުރެއްވީ މިއަދު ގުޅީގައި ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް މުއިއްޒުގެ ވާހަކަފުޅުގައި، މާލެ ސަރަހައްދުގައި ކުރިއަށްގެންދާ ރަސްމާލެ މަޝްރޫޢުއަކީ ބޯހިޔާވަހިކަމުގެ މައްސަލަތަކަށް ހައްލު ހޯދައިދޭނެ މަޝްރޫޢުއެއްގެ ގޮތުގައި ފާހަގަކުރެއްވިއެވެ. މި މަޝްރޫޢުއަކީ އެއް ސަރަހައްދެއްގައި އެންމެ ގިނަ މީހުން ދިރިއުޅޭނެ މަޝްރޫޢު ކަމަށްވެސް ވިދާޅުވިއެވެ.
އިތުރު ޑްރެޖަރުތައް ގެނައުމާއެކު ރަސްމާލެ ހިއްކުމުގެ މަޝްރޫޢުގެ މަސައްކަތް ތިންގުނަ އަވަސްވެގެންދާނެ ކަމަށް ރައީސް ވިދާޅުވެފައިވެއެވެ. އަދި މިއީ މާލެ ސަރަހައްދުގެ އިތުރުން މުޅި ރާއްޖޭގެ އެންމެންނަށް ފައިދާކުރާނެ މަޝްރޫޢުއެއްކަން ޔަގީންކަމާއެކު ވިދާޅުވިއެވެ.
މިދިޔަ އަހަރު ވާރުތަވި އިގްތިސާދީ މައްސަލަތަކުގެ ސަބަބުން މަޝްރޫޢުގެ މަސައްކަތް އެންމެ އެދެވޭ ގޮތަށް ކުރިއަށް ގޮސްފައި ނުވިނަމަވެސް، މިހާރު އެ ގޮންޖެހުންތަކުން އަރައިގަނެ، މަޝްރޫޢުގެ މަސައްކަތްތައް ފެށުމަށް ތައްޔާރުވަމުންދާކަމަށް ރައީސް ހާމަކުރެއްވިއެވެ. މި މަޝްރޫޢުއަކީ ބޯހިޔާވަހިކަމުގެ އިތުރުން އިގްތިސާދީ ފުރުސަތުތައްވެސް ފަހިވެގެންދާނެ މަޝްރޫޢުއެއް ކަމުގައި ފާހަގަކުރެއްވިއެވެ.
ރަސްމާލެ ހިއްކުމުގެ މަސައްކަތް 12 ސަރަހައްދަކަށް ބަހާލެވިފައިވާއިރު، އޭރިއާ "ޖޭ" ގެ 29 ހެކްޓަރުގެ ސަރަހައްދު މިހާރު ވަނީ އެއްކޮށް ހިއްކާ ނިމިފައެވެ. އިމާރާތްކުރުމާ ބެހޭ ވަޒީރު މުއްތަލިބް ވިދާޅުވެފައިވާ ގޮތުގައި، ވެލި ލިބުމުގެ ދަތިތަކާ ގުޅިގެން ހިއްކުމުގެ މަސައްކަތް ހުއްޓިފައިވީ ނަމަވެސް، މަޝްރޫޢުއާ ގުޅޭ އެހެނިހެން މަސައްކަތްތައް ކުރިއަށްދެއެވެ.
ފުށިދިއްގަރުފަޅު ހިއްކައިގެން ތަރައްގީކުރެވޭ ރަސްމާލެއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިޢުލާންކޮށްފައިވާ އެންމެ ބޮޑު މަޝްރޫޢުއެވެ. މި މަޝްރޫޢުގެ ދަށުން 1200 ހެކްޓަރުގެ ސަރަހައްދެއް ހިއްކައި، 11900 އަށްވުރެ ގިނަ ގޯއްޗާއި 26000 ފްލެޓު ދޫކުރުމަށް ވަނީ ރޭވިފައެވެ.
