މޫސުމާ ބެހޭ ގައުމީ އިދާރާއިން ށ. އަތޮޅުން ފެށިގެން ޅ. އަތޮޅާ ހަމައަށް ހުރި ސަރަހައްދުތަކަށް ރީނދޫ ސަމާލެއް ނެރެފައިވެއެވެ. މިރޭ 1 ގެ ނިޔަލަށް ނެރެފައިވާ މި ސަމާލުގައި ވިދާޅުވެފައިވަނީ އެ ސަރަހައްދުތަކުގައި ގުގުރުމާއެކު ބޯކޮށް ވާރޭވެހުމުގެ ފުރުސަތު އޮތް ކަމަށެވެ.
މީގެ އިތުރުން މާދަމާ ހެނދުނު 6 އާ ހަމައަށް ކުރެވޭ މޫސުމުގެ ލަފާގައި އުތުރާއި މެދުރާއްޖެތެރޭގެ އެކި ސަރަހައްދުތަކަށް ވިއްސާރަވެ، ގުގުރުމާއެކު ބޯވާރޭ ވެހުމުގެ ފުރުސަތު އޮތްކަމަށް މެޓްއިން ފާހަގަކުރައްވައެވެ. އަދި ދެކުނުގެ އެކި ސަރަހައްދުތަކަށް ކެރީގެ އަސަރު ކޮށް، ގުގުރުމުގެ ފުރުސަތު އޮތްކަމަށްވެސް ފާހަގަކުރައްވާފައިވެއެވެ.
ވައިޖެހޭ ދިމާލަށް ބަލާއިރު، ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން، އަދި އެހެން ސަރަހައްދުތަކަށް އިރުއުތުރާއި އިރުން ގަޑިއަކު 6 މޭލާއި 16 މޭލާ ދެމެދުގެ ބާރުމިނުގައި ވައިޖެހޭނެކަމަށް ލަފާކުރެވެއެވެ. ވިލާގަނޑުގައި ވައިގެ ބާރުމިން ގަޑިއަކު 30 މޭލަށް އަރާފާނެކަމަށްވެސް މެޓްއިން ވިދާޅުވެފައިވެއެވެ.
މިރޭގެ ކަނޑުގެ ޙާލަތަށް ބަލާއިރު، އާންމު މިންވަރަކަށް ކަނޑު ގަދަވެ، ވިލާގަނޑުގައި އިތުރަށް ގަދަވުމުގެ ފުރުސަތު އޮތްކަމަށް ވިދާޅުވެފައިވެއެވެ. ރާޅުގެ އުސްމިން 3 ފޫޓާއި 5 ފޫޓާ ދެމެދުގައި ހުންނާނެކަމަށް ލަފާކުރެވޭއިރު، ދިޔަވަރު ބޮޑުވާ ވަގުތުތަކުގައި އުތުރުގެ ބައެއް ރަށްތަކަށް އުދައިގެ އަސަރުކުރުމުގެ ފުރުސަތު އޮތްކަމަށްވެސް މެޓްއިން ފާހަގަކުރައްވާފައިވެއެވެ.
