ވިލިމާލޭގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކާގޮތުން މިއަދަކީ މާލެ ސަރަހައްދުގެ ޖައްވު ވަރަށް ބޮޑަށް ނުސާފުވެފައިވާ ދުވަހެކެވެ.
ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ކެމްޕަސް އިމާރާތުގައި ހަރުކޮށްފައިވާ މޮނީޓަރިން ސިސްޓަމުން ދައްކާ ގޮތުގައި މި ސަރަހައްދުގެ ވައިގެ ކޮލިޓީ މިހާރު ހުރީ 107ގައެވެ. މިއީ ސިއްހަތަށް ނުރައްކާތެރި މިންވަރެއް ކަމަށްވާތީ، ބޭރަށް ދާއިރު މާސްކު އެޅުމަށް އިރުޝާދު ދީފައިވެއެވެ. ހާއްސަކޮށް ހައި ރިސްކް ގިންތީގައި ހިމެނޭ މީހުން މިކަމަށް ސަމާލުވާންޖެހެއެވެ. އަދި މެންދުރު 12:00ގެ ފަހުން މި ސަރަހައްދުގެ ވައިގެ ކޮލިޓީ މޮޑަރޭޓް ލެވެލަށް ދަށްވާނެ ކަމަށް ލަފާކުރެވެއެވެ.
މިދިޔަ ހަފުތާގައި ރާއްޖެއަށް ކުރި ގަދަ ވިއްސާރައަށް ފަހު، އިއްޔެއިން ފެށިގެން ރާއްޖޭގެ ޖައްވު ވަނީ އަލުން ތަޣައްޔަރުވާން ފަށާފައެވެ. މިވަގުތު ހޭޒްގެ އަސަރު އެންމެ ބޮޑަށް ކުރަމުންދަނީ ރާއްޖޭގެ އުތުރުގެ ސަރަހައްދުތަކަށެވެ. ކޮންމެ އަހަރެއްގެ އިރުވައި މޫސުމުގައިވެސް ރާއްޖެއަށް މިފަދަ ހޭޒްގެ އަސަރު ކުރަމުންދަނީ އުތުރު އިންޑިއާގެ ސަރަހައްދުތަކުން އަންނަ ނުސާފު ވައިގެ ސަބަބުންނެވެ.
ނަމަވެސް، މި އަހަރު އިރުވައި މޫސުން ފެށުމުގެ ކުރިން ވެސް ރާއްޖެއަށް ހޭޒްގެ އަސަރު ކުރިއެވެ. އާންމު ގޮތެއްގައި މި އަސަރު ކުރަނީ ބޭ އޮފް ބެންގަލްގެ ކަނޑުން އަންނަ ވަޔާއެކުގައެވެ. އެހެންނަމަވެސް މި އަހަރުގެ ޑިސެމްބަރު މަހުގެ ކުރީކޮޅު ތަޣައްޔަރު ވައި އައީ އަރަބި ކަނޑުންނެވެ. މިކަމުގެ ސަބަބެއް ކަމަށް ބެލެވުނީ އުތުރު އިންޑިއާގެ ސަރަހައްދުގައި އުފެދުނު "ފެންގާލް" ތޫފާނުގެ ވައިގެ މިސްރާބު ހުރިގޮތުންނެވެ.
އެހެން އަހަރުތަކާ ޚިލާފަށް މި އަހަރު އިރުވައި މޫސުން ފެށުނީ ލަސްކޮށް، މިދިޔަ ބުރާސްފަތި ދުވަހުއެވެ. އުތުރު އިންޑިއާގެ ސަރަހައްދުތަކުން އަންނަ މި ތަޣައްޔަރު ވައިގައި އެކުލެވިގެންވަނީ ހިރަފުހާއި ކާރުހާނާތަކުން އަރާ ދުމެވެ. މިކަމުގެ ސަބަބުން ލޮލަށް ފެންނަ ދުރުމިން ދަށްވެ، ދަތުރުފަތުރު ކުރުމަށް ދަތިވުމުގެ އިތުރުން އެކިއެކި ސިއްހީ މައްސަލަތައް ވެސް ކުރިމަތިވެއެވެ.
