ރާއްޖެއަށް މިހާރު ކުރަމުންދާ ވިއްސާރައިގެ ތެރޭގައި އިއްޔެ އާއި ރޭ މާލެ ސަރަހައްދަށް ވަރަށް ބޯކޮށް ވާރޭވެހި، މާލެއަށް 162 މިލިމީޓަރު އަދި ހުޅުމާލެއަށް 164 މިލިމީޓަރުގެ ވާރޭ ވެހިފައިވާކަން މޫސުމާބެހޭ ޤައުމީ އިދާރާ، މެޓް އޮފީހުން ހާމަކޮށްފިއެވެ.
އިއްޔެ ހެނދުނުން ފެށިގެން ކުރި މި ބޯ ވިއްސާރައިގައި މާލޭގެ މަގުތަކުގައި ބޮޑަށް ފެންބޮޑުވެ، ގޭގެއަށާއި ވިޔަފާރިތަކަށް ފެންވަދެ، ބޮޑެތި ގެއްލުންތަކެއް ވަނީ ލިބިފައެވެ. މި ގެއްލުންތަކުގެ ސަބަބުން 36 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދިނުމަށް ޖެހުނުކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ބުނެފައެވެ. އަދި މި ވިއްސާރައިގައި މާލޭގެ މަގުތަކުން 30,569 ޓަނުގެ ފެން ހިންދާފައިވާކަމަށް އެމްއެންޑީއެފުން މައުލޫމާތު ދީފައިވެއެވެ.
މެޓް އޮފީހުގެ ލަފާގައި، މިހާރު ރާއްޖެއަށް ކުރަމުންދާ ވިއްސާރަ މި ހަފުތާ ބަންދަށްވެސް ދެމިގެންދާނެ ކަމަށާއި، މޫސުން ރަނގަޅުވާން ފަށާނީ ހޮނިހިރު ދުވަހަށްފަހު ކަމަށް ބެލެވެއެވެ.
