އިންޑިއާގެ ޖާސޫސީ އިދާރާ، ރޯ އިން ރައީސް ޑރ. މުހައްމަދު މުއިއްޒުގެ ވެރިކަން ވައްޓާލަން ރޭވި ކަމަށް ވޮޝިންގްޓަން ޕޯސްޓުގައި ޝާއިއުކުރި ރިޕޯޓު ދިވެހި ސަރުކާރުން ދޮގުކޮށްފިއެވެ.
އިންޑިއާ އަށް މިހާރު ކުރައްވަމުން ގެންދަވާ ރަސްމީ ދަތުރުފުޅެއްގައި، ފޮރިން މިނިސްޓަރު ހަލީލު "ވިއޮން" ނޫހަށް ދެއްވި އިންޓަވިއުއެއްގައި ވިދާޅުވެފައިވަނީ، ވޮޝިންގްޓަން ޕޯސްޓުގެ ރިޕޯޓުގައިވާ ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށެވެ. އަދި އެއީ ކޮން ތަނަކުން ހޯދި ހެކިތަކެއްގެ މައްޗަށް ބިނާކޮށް ލިޔުނު ރިޕޯޓެއްކަން އެނގިވަޑައި ނުގަންނަވާ ކަމަށް ވެސް ވިދާޅުވިއެވެ.
ވޮޝިންގްޓަން ޕޯސްޓުގެ ރިޕޯޓުގައި ބުނެފައިވަނީ، "ޑިމޮކްރެޓިކް ރިނިއުވަލް އިނިޝިއޭޓިވް" ގެ ނަމުގައި ރޯ އިން ތައްޔާރުކޮށްފައިވާ ޑޮކިއުމެންޓެއްގައި، ރައީސް މުއިއްޒުގެ ވެރިކަން ވައްޓާލުމަށް ރައްޔިތުންގެ މަޖިލީހުގެ 40 މެންބަރަކަށާއި، ސިފައިންނާއި ފުލުހުންގެ 10 އިސް އޮފިސަރަކަށް އަދި ރާއްޖޭގެ ނަން މަޝްހޫރު ތިން ގޭންގަކަށް ރިޝްވަތު ދިނުމަށް ރާވާފައިވާ ކަމަށެވެ. މި ޕްލޭން ތަންފީޒުކުރުމަށް ބޭނުންވާ ހަ މިލިއަން ޑޮލަރު އިންޑިއާއިން ހޯދުމަށް މަޝްވަރާކުރެވުނު ނަމަވެސް، ޕްލޭނާ އެއްގޮތަށް ކަންކަން ނުދިއުމުން އިންޑިއާއިން ފައިސާ ދޭން ދެކޮޅުހެދި ކަމަށްވެސް ބުނެފައިވެއެވެ.
މި ރޭވުންތަކުގައި އިންޑިއާގެ ފަރާތުން އިސްކޮށް މަސައްކަތްކުރީ ކުރީގެ ފުލުހެއް ކަމަށްވާ ޝިރީޝް ތޮރާތާއި، އިންޑިއާގެ ވެރިކަންކުރާ ޕާޓީ ބީޖޭޕީގެ ކުރީގެ ތަރުޖަމާނު ސަވިއޯ ރޮޑްރީގްސްއެވެ. ނަމަވެސް، މި ދެމީހުން މަސައްކަތްކުރީ ރަސްމީކޮށް އިންޑިއާ ސަރުކާރުގެ ފަރާތުން ކަމެއް ސާފެއް ނޫނެވެ.
މި މައްސަލައިގައި އިންޑިއާ ސަރުކާރުން ވެސް ވަނީ އިންކާރުކޮށްފައެވެ. އިންޑިއާގެ ހާރިޖީ ވުޒާރާގެ ތަރުޖަމާނު ރަންދީރު ޖައިސްވާލް ވިދާޅުވެފައިވަނީ ވޮޝިންގްޓަން ޕޯސްޓުގެ ރިޕޯޓަކީ ސައްހަ ލިޔުމެއް ނޫން ކަމަށެވެ.
