މޫސުމާ ބެހޭ ގައުމީ އިދާރާއިން މިއަދު ނެރުނު އޮރެންޖު އެލާޓުގެ މުއްދަތު އިތުރުކޮށްފިއެވެ. އެންމެ ފުރަތަމަ މެންދުރުފަހު 3:00 އިން ރޭގަނޑު 7:00 އާ ހަމައަށް ނެރުނު އެލާޓް މިހާރު ވަނީ މިރޭ 11:00 އާ ހަމައަށް އިތުރުކޮށްފައެވެ. މި އެލާޓް ނެރެފައިވަނީ ބ. އަތޮޅުން ފެށިގެން ތ. އަތޮޅާ ހަމައަށެވެ. މި ސަރަހައްދުތަކަށް ގުގުރުމާއެކު ބޯކޮށް ވާރޭވެހި، ފެންބޮޑުވުމުގެ ފުރުސަތު އޮތްކަމަށް މެޓް އޮފީހުން ވަނީ ބުނެފައެވެ.
މި ވަގުތު ރާއްޖޭގެ މޫސުން ވަނީ ވަރަށް ބޮޑަށް ގޯސްވެފައެވެ. ފާއިތުވި 24 ގަޑިއިރުގެ ތެރޭގައި ށ. ނަރުދޫ އާއި ރ. އިނގުރައިދޫއަށް އުދައަރާފައިވެއެވެ. އަދި ފ. ނިލަންދޫ، ފ. މަގޫދޫ، ދ. ކުޑަހުވަދޫ އަދި ދ. މީދޫގައި ފެންބޮޑުވުމުގެ ހާދިސާތައް ހިނގާފައިވެއެވެ.
މި ގޯސް މޫސުމުގެ ސަބަބަކީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި، އެއާ ގުޅިފައިވާ ލޯޕްރެޝަރ ޓްރަފް ކަމަށް މެޓް އޮފީހުން ވަނީ ހާމަކޮށްފައެވެ. މިކަމުގެ ސަބަބުން އައު އަހަރުގެ ބަންދުގައި ރާއްޖެއަށް ވަރަށް ބޮޑަށް ވިއްސާރަކުރާނެ ކަމަށް ލަފާކުރެވެއެވެ. އެހެންކަމުން، ހުރިހާ ފަރާތްތަކުންވެސް މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ. މޫސުން ރަނގަޅުވާނެ ކަމަށް ލަފާކުރެވެނީ މި ހަފްތާ ބަންދަށްފަހު އަންނަ އާދީއްތަ ދުވަހުއެވެ.
