އެސްޓީއޯއިން މާފަންނުގައި އައު ފާމަސީއެއް ހުޅުވައިފިއެވެ. މި ފާމަސީ ހުޅުވާފައިވަނީ މާފަންނު މަޖީދީމަގުގައި ހުންނަ 'ވެލިގާ ހާޑްވެއަރ’ގެ އިރުމަތީ ކަންމަތީގައެވެ. އެ ސަރަހައްދަކީ ގިނަ ކްލިނިކްތަކެއް ހިންގާ ސަރަހައްދަކަށް ވުމުން، ޑޮކްޓަރަށް ދައްކާ ފަރާތްތަކަށް މި އައު ފާމަސީން ފަސޭހައިން ބޭސް ގަނެވޭނެ ކަމަށް އެސްޓީއޯއިން ވަނީ ފާހަގަކޮށްފައެވެ.
ޒަމާނީ ކޮންސެޕްޓަކަށް ފަރުމާކޮށްފައިވާ މި ފާމަސީގައި ބޭހުގެ އިތުރުން ސިއްހީ އިކުއިޕްމަންޓް، ހޯމްކެއާ އަދި ޕާސަނަލް ކެއާ ރޭންޖުގެ ތަފާތު ސާމާނު ވެސް ވިއްކުމަށް ހަމަޖެހިފައިވެއެވެ. ދެ ފަންގިފިލާގައި ހިންގާ މި ފާމަސީގެ މަތީ ފަންގިފިލާ ހާއްސަކޮށްފައިވަނީ މެޑިކަލް އިކުއިޕްމަންޓާއި މެޑިކަލް ކޮންޒިއުމަބަލްސްގެ ތަފާތު، ފަހުގެ ޒަމާނީ ތަކެއްޗަށެވެ. އަދި ދެވަނަ ފަންގިފިލާގައި ހޯލްސޭލް ކަސްޓަމަރުންނަށް ހާއްސަ ކައުންޓަރެއް ޤާއިމުކޮށްފައިވެއެވެ.
މި ފާމަސީ މެދުވެރިކޮށް ކަސްޓަމަރުންނަށް ބޭނުންތެރި އަދި މުހިންމު އެތައް ވަސީލަތެއް ލިބޭނެ އިންތިޒާމް ހަމަޖެހިފައިވާތީ، ފާމަސީ ހުޅުވުމާ އެކު ހިދުމަތް ހޯދަން އަންނަ ފަރާތްތަކަށް ގިނަ ފަސޭހަތަކެއް ލިބިގެންދާނެ ކަމަށް އެސްޓީއޯއިން ވަނީ ބުނެފައެވެ.
މި ފާމަސީ ހުޅުވާފައި ހުންނާނީ ހުކުރު ދުވަސް ފިޔަވައި އެހެން ދުވަސްތަކުގައި ހެނދުނު 8:00 އިން ރޭގަނޑު 10:00 އަށެވެ. އަދި ހުކުރު ދުވަހު ހުޅުވާފައި ހުންނާނީ މެންދުރު 2:00 އިން ރޭގަނޑު 10:00 އަށެވެ.
