ފުލުހުންގެ ހޭލުންތެރިކުރުމުގެ ޕްރޮގްރާމްތަކާއި ޚާއްސަ އޮޕަރޭޝަންތަކުގެ ސަބަބުން ޓްރެފިކް ގަވާއިދާ ޚިލާފުވާ މިންވަރު މަދުވެފައިވާކަމަށް ފުލުހުންގެ ޚިދުމަތުން ބުނެފިއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި މަޢުލޫމާތު ދެއްވަމުން އިންސްޕެކްޓަރ އޮފް ޕޮލިސް އިބްރާހިމް ޚަލީލް ވިދާޅުވި ގޮތުގައި އާ އަހަރާ ދިމާކޮށް ފުލުހުން ވަނީ ޚާއްސަ އޮޕަރޭޝަންތަކެއް ފަށާފައެވެ. ފާއިތުވި ހަފުތާގައި މާލެ އާއި ހުޅުމާލޭގައި ހިންގި މި އޮޕަރޭޝަންތަކުގައި، ހަމައެކަނި ހުޅުމާލޭގައި ވެސް ދުވާލަކު އެވްރެޖްކޮށް ހާހަކަށް އުޅަނދު ހިފަހައްޓައި ބަލައި ފާސްކޮށްފައިވެއެވެ.
އިބްރާހިމް ޚަލީލް އިތުރަށް ވިދާޅުވި ގޮތުގައި މި އޮޕަރޭޝަންތަކުގެ ސަބަބުން ޓްރެފިކް ގަވާއިދުތަކަށާއި އުޅަނދުފަހަރު ގަވާއިދާ އެއްގޮތަށް ބޭނުންކުރުމަށް ރައްޔިތުން ދޭ ސަމާލުކަން ވަނީ އިންތިހާއަށް އިތުރުވެފައެވެ. އެގޮތުން ލައިސަންސް ނެތި އުޅަނދު ދުއްވާ މިންވަރު މަދުވެ، އުޅަނދުތަކަށް ނަގަންޖެހޭ ހުއްދަތައް ހަމަކުރުމަށް ރައްޔިތުން ދޭ ސަމާލުކަން ވެސް ވަނީ އިތުރުވެފައެވެ.
ޑިސެމްބަރު 24 އިން ފެށިގެން ކުރިއަށް ގެންދިޔަ އޮޕަރޭޝަންތަކުގައި، ކޮންމެ ދުވަހަކު ހުޅުމާލެއިން އެކަނި ވެސް ހާހާ ގާތަށް އުޅަނދު ބަލައި ފާސްކުރެވުނު ނަމަވެސް، ގަވާއިދާ ޚިލާފަށް ދުއްވާ އުޅަނދުގެ އަދަދު ވަނީ ވަރަށް ބޮޑަށް މަދުވެފައެވެ. މިކަން ލައިސަންސް، އަހަރީ ފީ އަދި ރޯޑް ވާދިނަސްއަށް ބެލިކަމުގައި ވިޔަސް ފާހަގަކުރެވެއެވެ.
ފުލުހުންގެ ރައްކާ ކެމްޕެއިންގެ ދަށުންނާއި އެހެނިހެން އޮޕަރޭޝަންތަކުގެ ތެރެއިން، މަގުމަތީގެ ސަލާމަތާއި ރައްކާތެރިކަމަށް އާންމުން ހޭލުންތެރިކުރުމަށް ގިނަ ޕްރޮގްރާމްތަކެއް ދަނީ ހިންގަމުންނެވެ. އަދި ކަމާ ގުޅުންހުރި މުއައްސަސާތައް ގުޅިގެން، އުޅަނދުތައް ރަޖިސްޓްރީކޮށް ދުއްވާ ޒޯންތައް ކަށަވަރުކުރުމުގެ މަސައްކަތާއި މަގުތައް ޕެޓްރޯލްކުރުމުގައި ފުލުހުންގެ ހަރަކާތްތެރިކަން ވަނީ އިތުރުކޮށްފައެވެ. މީގެ އިތުރުން ނެއިބަރހުޑް ޕޮލިހުން ރައްޔިތުންގެ ގާތަށް ގޮސް ހޭލުންތެރިކަން އިތުރުކުރުމަށް ހިންގާ ޕްރޮގްރާމްތައް ވެސް ވަނީ އިތުރުކޮށްފައެވެ.
އިންސްޕެކްޓަރ އޮފް ޕޮލިސް އިބްރާހިމް ޚަލީލް ނިންމާލަމުން ވިދާޅުވި ގޮތުގައި އާންމުންގެ ހޭލުންތެރިކަން އިތުރުކުރުމަށާއި މަގުތަކުގައި ފުލުހުންގެ ހަރަކާތްތެރިކަން އިތުރުކުރުމަށް ކުރަމުންދާ މަސައްކަތްތަކުގެ ހެޔޮ ނަތީޖާ ދަނީ ފެންނަމުންނެވެ.
