މާލެއިން އެކި ރަށްރަށަށް މިއަދު ދަތުރުކުރި ފްލައިޓްތައް މޫސުން ގޯސްވުމާ ގުޅިގެން އަނބުރާ މާލެ އައިސްފައިވެއެވެ. މި ދުވަސްކޮޅު ރާއްޖޭގެ އެކި ސަރަހައްދުތަކުގައި މޫސުން ވަނީ ވަރަށް ގޯސްވެފައެވެ. އަދި ބައެއް ސަރަހައްދުތަކަށް މޫސުމާ ބެހޭ އިދާރާއިން ވަނީ ޔެލޯ އެލާޓް ނެރެފައެވެ.
ފްލައިޓް ރާޑާއިން ދައްކާ ގޮތުގައި މިއަދު ހެނދުނު އދ. މާމިގިއްޔަށް ދަތުރުކުރި ވިލާ އެއާގެ ފްލައިޓް އެއަރޕޯޓުގައި ޖެއްސުމަށް ގިނަ މަސައްކަތްތަކެއް ކުރުމަށްފަހު، ގާތްގަނޑަކަށް އެއް ގަޑިއިރު މަތީގައި ހޭދަކުރުމަށްފަހު، މޫސުން ގޯސްވުމާ ގުޅިގެން އަނބުރާ މާލެ އައިސްފައިވެއެވެ. މޫސުން މާ ބޮޑަށް ގޯސްވެއްޖެނަމަ، މަތީގެ ވިސިބިލިޓީ ދަށްވެއެވެ. މިފަދަ ހާލަތްތަކުގައި އާންމު ގޮތެއްގައި މޫސުން ރަނގަޅުވަންދެން ބޯޓުތައް މަތީގައި މަޑުކުރާއިރު، އެއްވެސް ގޮތަކުން މޫސުން ރަނގަޅުވާނެކަމުގެ އަލިމަގެއް ނުފެންނަނަމަ އެންމެ ކައިރީގައި ހުންނަ އެއަރޕޯޓަކަށް ޖައްސައެވެ.
އާ އަހަރުގެ ބަންދާއެކު މުޅި ރާއްޖެއަށް ވިއްސާރަ ކުރަމުންދާއިރު، މިދިޔා ދެތިން ދުވަހު ކުރަން ފެށި ވިއްސާރަ މިއަދު ވަނީ އިތުރަށް ގޯސްވެފައެވެ. އެގޮތުން ކ. އަތޮޅުން ފެށިގެން ތ. އަތޮޅާ ހަމައަށް ވަނީ ޔެލޯ އެލާޓް ނެރެފައެވެ. މޫސުމާބެހޭ އިދާރާއިން މަޢުލޫމާތު ދީފައިވާ ގޮތުގައި މިއަދު ހަވީރު 3 ޖަހަންދެން މޫސުން ގޯސްވެ، ބޯކޮށް ވާރޭވެހި، ވިލާގަނޑުގައި ވައި 45 މޭލުގެ ބާރުމިނުގައި ޖެހޭނެކަމަށް ލަފާކުރެވެއެވެ. އަދި މި މުއްދަތުގައި ކަނޑުތައްވެސް ވަރަށް ގަދަވާނެކަމަށް ބެލެވެއެވެ. މޫސުމާބެހޭ އިދާރާއިން ކުރިން ލަފާކޮށްފައިވާ ގޮތުގައި މޫސުން އަލިކޮށްލާނީ މި މަހުގެ 5 ވަނަ ދުވަހުގެ ފަހުންނެވެ.
