މެޓް އޮފީހުން މިއަދު ކ އަތޮޅުން ފެށިގެން ތ އަތޮޅަށް ބޯކޮށް ވާރޭވެހި ގުގުރާނެ ކަމަށް ލަފާކޮށް ރީނދޫ ސަމާލު ނެރެފިއެވެ. މި ސަމާލު ނެރެފައިވަނީ މިއަދުގެ 11:15 އިން 15:00 އަށެވެ. މީގެ އިތުރުން، މި ސަރަހައްދުގެ ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށްވެސް ލަފާކުރެއެވެ.
މެޓް އޮފީހުން ވަނީ ބ އަތޮޅުން ފެށިގެން ލ އަތޮޅަށް މިއަދު 10:30 އިން 16:30 އަށް ހުދު ސަމާލެއް ނެރެފައެވެ. އަދި ބ އަތޮޅުން ފެށިގެން އައްޑޫ ސިޓީއާ ހަމައަށް 11:00 އިން 16:30 އަށް މި ސަމާލު ދަންމާލާފައިވެއެވެ.
މެޓް އޮފީހުގެ ލަފާގައި، ކުރިއަށް އޮތް 24 ގަޑިއިރު ރާއްޖޭގެ އެކި ހިސާބުތަކަށް ގުގުރުމާއެކު ވިއްސާރަވެ، ބޯކޮށް ވާރޭވެހޭނެއެވެ. ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވެއެވެ. އެހެން ހިސާބުތަކަށް އިރުއުތުރާއި އިރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ބެލެވެއެވެ.
ރާއްޖޭގެ ދެކުނުގެ ހިސާބުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި، އެހެން ހިސާބުތަކުގެ ކަނޑުތައް އާންމު ގޮތެއްގައި މަޑުވާނެ ކަމަށް މެޓް އޮފީހުން ލަފާކުރެއެވެ. ރާޅުތަކުގެ އުސްމިން 2 ފޫޓާއި 5 ފޫޓާ ދެމެދު، އަދި 4 ފޫޓާއި 7 ފޫޓާ ދެމެދުގައި ހުންނާނެ ކަމަށް ބެލެވެއެވެ.
މި ހާލަތާ ގުޅިގެން، ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވެއެވެ. އަދި ދިޔަވަރު ބޮޑުވާ ވަގުތުގައި އުތުރާއި މެދުރާއްޖެތެރޭގެ ރަށްތަކަށް އުދައެރުން އެކަށީގެންވާތީ، އެކަމަށް ސަމާލުވެ ރައްކާތެރިކަމުގެ ފިޔަވަޅުތައް އަޅައިގެން ތިބުމަށްވެސް އާންމުންނަށް އިލްތިމާސްކޮށްފައިވެއެވެ.
