ފީއަލި ރަށު ކައުންސިލާއި ޕޮލިސް ޕޯސްޓާއި އެމްޓީސީސީގެ މުވައްޒަފުން ގުޅިގެން، ފީއަލިން ދިގުވަރަށް ދަތުރުކޮށް ހާލުގައި ޖެހުނު ބަޔަކު އިއްޔެ ރޭ ސަލާމަތްކޮށްފިއެވެ.
އިއްޔެ މެންދުރުފަހު ކުޑަ ޑިންގީއެއްގައި ދިގުވަރަށް ދަތުރުކުރި މި ބަޔަކު ހާލުގައި ޖެހިފައިވާ ކަމުގެ މަޢުލޫމާތު ފީއަލި ޕޮލިސް ޕޯސްޓަށް ލިބުމާ ގުޅިގެން، އެމީހުންނަށް އެހީތެރިވުމަށް ފުލުހުންނާއި، ފީއަލީ ކައުންސިލާއި އެމްޓީސީސީ ފެރީގެ މުވައްޒަފުން ވަނީ ނުކުމެފައެވެ.
ބައެއް މީޑިއާތަކާއި މަޢުލޫމާތު ހިއްސާކުރަމުން ފީއަލި ކައުންސިލުގެ އޮފިޝަލަކު ވިދާޅުވި ގޮތުގައި، ދެ ގްރޫޕަކަށް ބަހާލައިގެން ކުރި މި ދަތުރުގައި، ފުރަތަމަ ގްރޫޕް އިރުއޮއްސުމުގެ ކުރިން ވަނީ ރަށަށް އާދެވިފައެވެ. ނަމަވެސް ދެވަނަ ގްރޫޕް ފަރުމަތީ ތިބެން ޖެހުނީ ފަރު ބޮޑަށް ހިކުމާއި، އަނދިރިވުމާއި، ވާރޭ ބޯވުމުގެ ސަބަބުން ވާނުވާ ނޭނގިފައެވެ.
އިތުރަށް މަޢުލޫމާތު ދެމުން އޮފިޝަލް ވިދާޅުވީ ރޭ 8:30 ހާއިރު ޑިންގީގައި ތިބި މީހުންނާ ހަމައަށް ދެވުނު ކަމަށާއި، 9:00 ޖެހުމުގެ ކުރިން އެ މީހުން ރަށަށް ގެނެވުނު ކަމަށެވެ. ފުލުހުންގެ ޓީމުން ފަރުމައްޗަށް ފައިބައިގެން ޑިންގީ ފުންކުރުމަށްފަހު، ފެރީގައި އެ މީހުން ރަށަށް ގެނެވުނެވެ. ޑިންގީ ދުއްވި ފަރާތް ފިޔަވައި، އެއް އާއިލާއަކަށް ނިސްބަތްވާ ހަތަރު އަންހެނުންނާއި ދެ ފިރިހެނުން މި ހާދިސާގައި ހިމެނެއެވެ.
އުފާވެރި ޚަބަރަކީ މި ހާދިސާގައި އެއްވެސް މީހަކަށް އަދި އެ މީހުން ދަތުރުކުރި ޑިންގީއަށްވެސް އެއްވެސް ގެއްލުމެއް ލިބިފައި ނުވުމެވެ.
