މާލެ ސަރަހައްދުގައި ފެން އުފައްދާ ކެޕޭސިޓީ ދެ ގުނަ އިތުރުކުރުމަށް ރާވާފައިވާކަން އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލްމަތީން މުހައްމަދު ހާމަ ކުރައްވައިފިއެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި އޭނާ ވިދާޅުވި ގޮތުގައި މިހާރު ވަނީ މާލެ އާއި ހުޅުމާލޭގައި އިތުރު ފެން ޕްލާންޓް ގާއިމުކުރުމުގެ މަސައްކަތް ފެށުމަށް ތައްޔާރުވެފައެވެ. މި ގޮތުން ހުޅުމާލެ އާއި މާލޭގައި 5000 ޓަނުގެ ޕްލާންޓެއް އަޅަން ވަނީ ނިންމާފައެވެ.
އަބްދުލްމަތީން އިތުރަށް ވިދާޅުވި ގޮތުގައި މި މަޝްރޫއު މި އަހަރުގެ ތެރޭގައި ނިންމުމަކީ ކުންފުނީގެ އަމާޒެއް ކަމަށާއި، މި ޕްލާންޓްތައް ގާއިމުކުރުމުން މާލޭގައި ފެން އުފައްދާ މިންވަރު 30 ޕަސެންޓް އިތުރުވެގެންދާނެއެވެ. މިހާރު މާލެ ސަރަހައްދުގައި ހުރި ޕްލާންޓްތަކުން ދުވާލަކު 20،000 ޓަނުގެ ފެން އުފައްދައެވެ.
މީގެއިތުރުން، މާލެ ސަރަހައްދުގެ ފެނުގެ ވިއުގަ ހަރުދަނާކުރުމުގެ ގޮތުން ސިނަމާލެ ބްރިޖުގެ އަރިމަތިން ހޮޅިއެއް އަޅައި މާލެ އާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތްވެސް ކުރިއަށްދާ ކަމަށާއި، މި މަސައްކަތް ނިމުމުން ގަޑިއަކު 800 ޓަނުގެ ފެން މާލެ އާއި ހުޅުމާލެ ދެމެދު ފޯރުކޮށްދެވޭނެއެވެ.
