ރައްޔިތުންގެ މަޖިލީހުން ފާސްކުރި އާ ގާނޫނުގެ ދަށުން މިއަދުން ފެށިގެން ފަތުރުވެރިކަމުގެ ދާއިރާގައި ހިދުމަތްދޭ ފަރާތްތަކުގެ އެކައުންޓުތަކަށް ވަންނަ ޑޮލަރު ރާއްޖޭގެ ބޭންކުތައް މެދުވެރިކޮށް މާރުކުރަން މިއަދުންފެށިގެން ތަންފީޒު ކުރަން ފަށައިފިއެވެ. މި ގާނޫނަކީ ރާއްޖޭގައި ބޭރު ފައިސާއިން ކުރެވޭނެ މުއާމަލާތްތަކާއި، ބޭރު ފައިސާ ރާއްޖެއަށް އެތެރެކުރުމާއި ބޭރުކުރުމުގެ އުސޫލުތައް ކަނޑައަޅާ ގާނޫނެކެވެ. ރައްޔިތުންގެ މަޖިލީހުން ފާސްކޮށް، ޑިސެމްބަރު 14 ވަނަ ދުވަހު ރައީސް ޑރ މުހައްމަދު މުއިއްޒު ތަސްދީގު ކުރެއްވި މި ގާނޫނުގެ ދަށުން، ކަނޑައެޅިފައިވާ ވަކި ހާލަތްތަކެއްގައި މެނުވީ ރާއްޖޭގައި ކުރެވޭ އެއްވެސް މަނިޓަރީ މުއާމަލާތެއް ދިވެހި ފައިސާ ފިޔަވައި އެހެން އެއްވެސް ބޭރު ފައިސާއަކުން ކުރުން މަނާކުރެއެވެ.
މި ގާނޫނުގެ ދަށުން ބޭރު ފައިސާގެ އާމްދަނީ ބޭންކު އެކައުންޓަކަށް ޖަމާކޮށް މާރުކުރަން ޖެހޭނީ ޓޫރިޒަމް ދާއިރާގެ ވިޔަފާރިތަކާއި އަހަރަކު މަދުވެގެން 15 މިލިއަން ޑޮލาރުގެ އާމްދަނީ ލިބޭ ފަރާތްތަކެވެ. "ކެޓެގަރީ އޭ" ގައި ހިމެނޭ ރިސޯޓުތަކުން ކޮންމެ ޓޫރިސްޓަކަށް 500 ޑޮލަރު ނުވަތަ މަހެއްގެ ޖުމްލަ އާމްދަނީގެ 20 ޕަސެންޓް މާރުކުރަން ޖެހޭއިރު، "ކެޓެގަރީ ބީ" ގައި ހިމެނޭ ގެސްޓްހައުސްތަކުން ކޮންމެ ޓޫރިސްޓަކަށް 25 ޑޮލަރު ނުވަތަ މަހެއްގެ ޖުމްލަ އާމްދަނީގެ 20 ޕަސެންޓް މާރުކުރަން ޖެހެއެވެ.
މި ގޮތްތަކުގެ ތެރެއިން ގޮތެއް އިޚްތިޔާރު ކުރުމުގައި އަމަލުކުރާނެ ގޮތްތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާނެއެވެ. އަދި މި ގާނޫނު ހިންގައި ތަންފީޒުކުރުމުގެ މައި އިދާރާއަކީވެސް އެމްއެމްއޭ އެވެ.
