ތިނަދޫ ސިޓީގެ ދަރަޖަ ބާތިލުކުރުމަށް ހައި ކޯޓަށް ހުށަހެޅުނު ދުސްތޫރީ މައްސަލަ އެ ކޯޓުން ބަލައިނުގަތުމާ ގުޅިގެން، އެ މައްސަލަ ސިވިލް ކޯޓަށް ހުށަހެޅުމަށް ނިންމާފައިވެއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ރިޔާސީ ކެމްޕޭނުގެ ތެރޭގައި ތިނަދޫއަށް ސިޓީގެ ދަރަޖަ ދެވުނު އިރު، އެ ރަށުގެ އާބާދީއަކީ އަށްހާސް މީހުންކަމަށް ތަފާސްހިސާބުތަކުން ދައްކައެވެ. މީގެ ތެރެއިން ރަށުގައި ދިރިއުޅެނީ ފަސްހާސް މީހުންކަމަށް ލަފާކުރެވެއެވެ. ނަމަވެސް، ލާމަރުކަޒީ ގާނޫނުގެ ދަށުން ސިޓީއެއްގެ ދަރަޖަ ދިނުމަށް އާބާދީގައި މަދުވެގެން ދިހަހާސް މީހުން ތިބެންޖެހެއެވެ.
މި މައްސަލަ ހައި ކޯޓަށް ހުށަހެޅުއްވީ އެންވަޔަރަންމަންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާގިބެވެ. ހައި ކޯޓުގެ ރަޖިސްޓްރާގެ ނިންމެވުމުގައި ވިދާޅުވެފައިވަނީ، ރައީސުލްޖުމްހޫރިއްޔާގެ ގަރާރަކީ ގާނޫނެއްގެ ދަރަޖަ ލިބިގެންވާ އެއްޗެއް ނޫންކަމަށާއި، އަދި އެއީ ރައްޔިތުންގެ މަޖިލީހުން ފާސްކޮށްފައިވާ ގާނޫނީ މަސްދަރެއްވެސް ނޫންކަމަށެވެ.
ރާގިބު ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ، ތިނަދޫ ކައުންސިލުން ހުށަހެޅި ލިސްޓަކީ އޮޅުވާލައިގެން އެކުލަވާލި ލިސްޓެއްކަން އެނގިފައިވެއެވެ. މި ލިސްޓުގައި އެތައް އަހަރެއް ކުރިން ނިޔާވެފައިވާ މީހުންނާއި، އައިޑީ ކާޑު ނަންބަރު ބަދަލުކޮށްގެން ތަކުރާރުކޮށް ހިމަނާފައިވާ ނަންތައް ހުރިކަން ފާހަގަކުރެވިފައިވެއެވެ. ޑީއެންއާރުން ލިބިފައިވާ މަޢުލޫމާތުން ދައްކާގޮތުގައި ތިނަދޫގެ އާބާދީއަކީ ހަތްހާސް މީހުންނެވެ.
މި މައްސަލައިގައި ރާގިބު ވަނީ ތިނަދޫ ކައުންސިލާއި ކުރީގެ ރައީސް އިބްރާހިމް މުހައްމަދު ސޯލިހުގެ މައްސަލަ ބެލުމަށާއި، ތިނަދޫއަށް ދީފައިވާ ސިޓީގެ ދަރަޖަ ބާތިލުކޮށްދިނުމަށް އެދިފައެވެ. އަދި މި މައްސަލަ ވަނީ ތިނަދޫ އުތުރު ދާއިރާގެ މެންބަރު ސަޢުދުﷲ ހިލްމީ ރައްޔިތުންގެ މަޖިލީހަށްވެސް ހުށަހަޅުއްވާފައެވެ. ރައީސް އޮފީހާ ދެކޮޅަށް މި މައްސަލަ ހުށަހެޅުމާ ގުޅިގެން ރާގިބު ވަނީ ސަރުކާރުގެ މަގާމުން ވަކިކުރައްވާފައެވެ.
