މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން މިއަދު ހާމަކުރި ގޮތުގައި މީލާދީ އައު އަހަރު ފާހަގަކުރުމުގެ ގޮތުން މިރޭ ހުޅުމާލޭ ސެންޓްރަލް ޕާކުގައި ހަވާ އެރުވުމުގެ ހަރަކާތެއް ކުރިއަށްގެންދާނެއެވެ. މި ހަރަކާތް ފެށުމަށް ހަމަޖެހިފައިވަނީ މިރޭ 23:59 ގައި ކަމަށާއި، 5 މިނިޓްގެ މުއްދަތަށް މި ހަރަކާތް ކުރިއަށްދާނެ ކަމަށް އެމްއެންޑީއެފްއިން މަޢުލޫމާތު ދީފައިވެއެވެ.
މީގެއިތުރުން، އައު އަހަރުގެ ޚާއްސަ ހަރަކާތެއްގެ ގޮތުގައި މިރޭ ހުޅުމާލޭގައި ޑްރޯން ޝޯއެއް ވެސް ބޭއްވުމަށް ވަނީ ހަމަޖެހިފައެވެ. މިރޭގެ ހަވާ އެރުވުމުގެ ހަރަކާތަށް ތައްޔާރުވުމުގެ ގޮތުން ސިފްކޯއިން މި މަހުގެ 26 ވަނަ ދުވަހުވެސް ހަވާ އަރުވާފައިވާކަން ފާހަގަކުރެވެއެވެ. އަދި ދިވެހިރާއްޖޭގެ އެކި ސަރަހައްދުތަކުގައި ބޭއްވޭ އެކި އިވެންޓްތަކުގައި ވިޔަފާރި އުސޫލުން ސިފްކޯއިން ހަވާ އެރުވުމުގެ ޚިދުމަތް ފޯރުކޮށްދެމުންދާކަން ވެސް ފާހަގަކުރެވެއެވެ.
