އަންނަ އަހަރުގެ ފުރަތަމަ ދެ ދުވަސް ސަރުކާރު ބަންދު ދުވަސްތަކެއްގެ ގޮތުގައި ހަމަޖެހިފައިވީ ނަމަވެސް، ޖެނުއަރީ 2 ވަނަ ދުވަހު މާލެއިން ޕާސްޕޯޓް ހިދުމަތް ދޭނެކަން އިމިގްރޭޝަނުން ހާމަކޮށްފިއެވެ.
މި ގޮތުން އިމުގާ ޕޯޓަލް މެދުވެރިކޮށް 24 ގަޑިއިރު ޕާސްޕޯޓަށް އެދި ހުށަހެޅުމުގެ ފުރުސަތު ހުޅުވާލާފައިވާއިރު، އުމުރުން 65 އަހަރުން މަތީގެ މީހުންނާއި އިމަޖެންސީ ހާލަތުގައި ހުށަހަޅާ ފަރާތްތަކަށް އިމިގްރޭޝަނަށް ހާޒިރުވެގެންނާއި އޮންލައިންކޮށް ހިދުމަތް ދޭނީ ޖެނުއަރީ 2 ވަނަ ދުވަހުގެ ހެނދުނު 8:30 އިން މެންދުރުފަހު 2:00 އަށެވެ. އަދި ޕާސްޕޯޓް ދޫކުރުމަށް ނަންބަރު ދޫކުރާނީވެސް އެ ގަޑިތަކުގައެވެ.
އިމިގްރޭޝަނުން ވަނީ ބަންދު ދުވަސްތަކުގެ ކުރިން ޕާސްޕޯޓުގެ މުއްދަތު ބަލައި، ދުރާލައި ޕާސްޕޯޓު ހެއްދުމަށް ހުށަހެޅުމަށް އާންމުންނަށް އިލްތިމާސްކޮށްފައެވެ. ނަމަވެސް އިމަޖެންސީ ހާލަތްތަކުގައި އެ އިދާރާއިން އަބަދުވެސް ޕާސްޕޯޓުގެ ހިދުމަތް ފޯރުކޮށްދެއެވެ.
