މޯލްޑިވިއަން އެއާލައިންސްއިން އެ ކުންފުނީގެ ފުރަތަމަ ވައިޑް-ބޮޑީ މަތިންދާބޯޓު، އެއާބަސް އޭ-330 ރާއްޖެ ގެނައުމާ ގުޅިގެން އަންނަ ހޯމަ ދުވަހުގެ ހަވީރު 5:00 އިން 5:30 އަށް މާލެ އާއި ހުޅުމާލޭގައި އެއާ ޝޯއެއް ބާއްވާގޮތަށް ހަމަޖައްސައިފިއެވެ. މި އެއާ ޝޯ ބާއްވާނީ މާލޭގެ އުސްފަސްގަނޑާއި ހުޅުމާލެ ފޭސް 1 އަދި 2 ގެ އިރުމަތީ އަތިރިމަތީގައެވެ.
Join us in celebrating a significant milestone as we welcome our first wide-body aircraft, Airbus A330! To mark this special occasion, we are hosting an exciting airshow on 6th January 2025 (Monday). Are you ready? #MaldivianAero #MaldivianAeroAirshow #FirstA330 pic.twitter.com/oMBYQwsiw2
— MaldivianAero (@MaldivianAero) December 30, 2024
މި ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވެފައިވަނީ އަންނަ މަހު ފުރަތަމަ ވައިޑް-ބޮޑީ އެއާކްރާފްޓު ގެނެސް އުދުހެން ފަށާނެ ކަމަށެވެ. އަދި އަންނަ އަހަރުގެ ތެރޭގައި ޗައިނާ އަދި ޔޫރަޕްގެ މަންޒިލްތަކަށް މި އެއާކްރާފްޓުން ދަތުރުތައް ފެށޭނެ ކަމަށްވެސް އެމަނިކުފާނު ވަނީ ހާމަކުރައްވާފައެވެ.
ޓްރާންސްޕޯޓު މިނިސްޓަރު މުހައްމަދު އަމީން މިދިޔަ ޑިސެމްބަރުގައި ވިދާޅުވެފައިވަނީ މި އައު އެއާކްރާފްޓާއެކު އިތުރު ހަތް މަންޒިލަކަށް ދަތުރުތައް ފެށޭނެ ކަމަށެވެ. މީގެ ތެރޭގައި ޗައިނާގެ ތިން ސިޓީއާއި، ސައުތު އެފްރިކާގެ ޖޮހޭނަސްބާގް އަދი ޔޫރަޕްގެ ތިން ސިޓީ ހިމެނެއެވެ.
ކުރީގައި މޯލްޑިވިއަން އެއާލައިންސްއިން ޗައިނާ އަދި ސައުތު އެފްރިކާއަށް ދަތުރުކުރި ނަމަވެސް، އެ ދަތުރުތައް ކުރަންޖެހުނީ އެހެން މަންޒިލްތަކަށް ޓްރާންސިޓްކޮށްގެންނެވެ. މިހާރު މޯލްޑިވިއަންގެ ފްލީޓުގައި ޖުމްލަ 13 ބޯޓު ހިމެނެއެވެ. މީގެ ތެރޭގައި އެއާބަސް އޭ320 އެއް ބޯޓާއި، އޭޓީއާރްގެ ހަތަރު ބޯޓު އަދި ބާކީ ހުރީ ޑޭޝް މަރުކާގެ ބޯޓުތަކެވެ. ބޭރު ދަތުރުތަކުގައި މިހާރު ބޭނުންކުރަނީ އެއާބަސް އޭ320 އެކަނިއެވެ.
އައު ވައިޑް-ބޮޑީ އެއާކްރާފްޓުގައި އެއްފަހަރާ 264 ފަސިންޖަރުންނަށް ދަތުރުކުރެވޭނެއެވެ. އަދި މި އެއާކްރާފްޓުން ދުރު މަންޒިލްތަކަށް ސީދާ ދަތުރުކުރުމުގެ ޤާބިލުކަން ލިބިގެންދާނެއެވެ.
