ޗައިނާއާ އެކު ޖެނުއަރީ އެއްވަނަ ދުވަހުން ފެށިގެން އަމަލުކުރަން ފަށާ މިނިވަން ވިޔަފާރީގެ އެއްބަސްވުމުގެ (އެފްޓީއޭ) ސަބަބުން ދިވެހި ވިޔަފާރިވެރިންނަށް ދުވަހަކު ވެސް ފަހިނުވާ ވަރުގެ ތަނަވަސް ފުރުސަތުތަކެއް ހުޅުވިގެންދާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
އެއްބަސްވުމަށް އަމަލުކުރަން ފެށުމާ ގުޅިގެން އިކޮނޮމިކް މިނިސްޓްރީގައި ބޭއްވުނު ޚާއްސަ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ސައީދު ވިދާޅުވީ، މި އެއްބަސްވުމުގެ ސަބަބުން ކުރިއަށް އޮތް ފަސް އަހަރު ތެރޭގައި ރާއްޖެއަށް އެތެރެކުރާ 90 އިންސައްތަ މުދަލުން ޑިއުޓީ މާފުވެގެންދާނެ ކަމަށެވެ.
މި އެއްބަސްވުމާ މެދު އުފެދިފައިވާ ކަންބޮޑުވުންތަކަށް ޖަވާބުދެއްވަމުން، ސައީދު ވިދާޅުވީ ޓްރެޑިޝަނަލް މާކެޓުތަކަށް މީގެ ނޭދެވޭ އަސަރެއް ނުކުރާނެ ކަމަށެވެ. އަދި ޑިއުޓީ މާފުވުމުގެ ސަބަބުން ދައުލަތަށް ލިބޭ އާމްދަނީ ގެއްލުނު ނަމަވެސް، ޖީއެސްޓީއާއި އެހެނިހެން ޓެކުހުގެ ގޮތުގައި އެ އާމްދަނީ އަނބުރާ ލިބޭނެ ކަމަށް ވެސް އޭނާ ފާހަގަކުރެއްވިއެވެ.
މިނިސްޓަރު ސައީދު އިތުރަށް ވިދާޅުވީ، ދުނިޔޭގެ އެންމެ ބޮޑު ބާޒާރާ އެކު މިފަދަ އެއްބަސްވުމެއް ގާއިމުކުރެވުމަކީ ރާއްޖެ ފަދަ ކުޑަ ޤައުމަކަށް ލިބޭ ވަރަށް މުހިންމު ފުރުސަތެއް ކަމަށެވެ. މި އެފްޓީއޭގެ ދަށުން ރާއްޖެއިން އެކްސްޕޯޓްކުރާ 296 ބާވަތެއްގެ ކަނޑުމަހުގެ އުފެއްދުންތައް އެއްވެސް ޑިއުޓީއަކާ ނުލައި ޗައިނާއަށް އެކްސްޕޯޓްކުރެވޭނެއެވެ.
މި އެއްބަސްވުމަކީ 2014 ވަނަ އަހަރު ޗައިނާއާއެކު ސޮއިކުރެވި، 2017 ވަނަ އަހަރު ރައްޔިތުންގެ މަޖިލީހުން ފާސްކޮށްފައިވާ އެއްބަސްވުމެކެވެ. މިހާރު ޗައިނާއާއެކު ކުރެވޭ 700 މިލިއަން ޑޮލަރުގެ ވިޔަފާރި މި އެއްބަސްވުމުގެ ސަބަބުން އެއް ބިލިއަން ޑޮލަރަށް އިތުރުވާނެ ކަމަށް ސަރުކާރުން ލަފާކުރެއެވެ.
