އެތައްހާސް ޓުއަރިސްޓުންނާއެކު ދެ ކްރޫޒްލައިނަރެއް މާލޭގައި ބަނދަރު ކޮށްފިއެވެ.
މި ދެ ކްރޫޒްލައިނަރ އައުމާއެކު، މި ސީޒަންގައި މިހާތަނަށް ރާއްޖެއަށް އައިސްފައިވާ ކްރޫޒްލައިނަރުގެ އަދަދު ވަނީ ތިނަކަށް އަރާފައެވެ.
މި ސީޒަންގެ ދެވަނަ ކްރޫޒްލައިނަރ، "އެމްއެސް ނޯވީޖިއަން ސްކައި" މާލެއަށް އައީ އާދީއްތަ ދުވަހުގެ ހެނދުނުގައެވެ. މި އުޅަނދުގައި 1،872 ފަސިންޖަރުން ތިބިއިރު، މޯލްޑިވްސް އެސޯސިއޭޝަން ފޯ ޔޮޓް އެޖެންޓްސް (މާޔާ) އިން މަޢުލޫމާތު ދިން ގޮތުގައި މި އުޅަނދު ރާއްޖޭގައި ދެ ދުވަހު ހޭދަކުރާނެއެވެ.
މި ސީޒަންގެ ތިންވަނަ ކްރޫޒްލައިނަރ "އެމްއެސް ރިވިއެރާ" މާލެއަށް އައީ ހޯމަ ދުވަހުގެ ހެނދުނުގައެވެ.
މި ދެ ކްރޫޒްލައިނަރުގައި އައި ހާހެއްހާ ފަތުރުވެރިން މާލެއާއި އެހެނިހެން ރަށްތަކަށް ޒިޔާރަތްކުރުމަށް އުޅަނދުން ފައިބާފައި ވެއެވެ.
މި ސީޒަންގެ ފުރަތަމަ ކްރޫޒްލައިނަރ "އެމްއެސް އައިޑާސްޓެލާ" މާލެއަށް އައީ ޑިސެމްބަރ 8 ވަނަ ދުވަހުގެ ހެނދުނުގައެވެ. މި އުޅަނދުގައި 2،140 ފަސިންޖަރުންނާއި 639 ފަޅުވެރިން ތިބިއެވެ. މި ސީޒަންގައި 14 ނުވަތަ 15 ކްރޫޒްލައިނަރ ރާއްޖެއަށް އަންނާނެ ކަމަށް ލަފާކުރެވެއެވެ. މި ސީޒަން ނިމޭނީ މާރޗް މަހުއެވެ.
ކްރޫޒްލައިނަރުތައް ރާއްޖެއަށް އަންނަން ފަށާފައިވާއިރު، މިއަހަރަށް އަމާޒުކުރި ދެ މިލިއަން ފަތުރުވެރިންގެ ލަނޑުދަނޑި ވަނީ ފާއިތުވި ހަފްތާގައި ހާސިލްކޮށްފައެވެ.
