އެމްޑީޕީގެ މެމްބަރުން ވަގަށް ޕީއެންސީގެ ދަފްތަރަށް ބަދަލުކުރަމުންދާ ކަމަށް ބުނެ އެ ޕާޓީން ކަންބޮޑުވުން ފާޅުކޮށް، އިލެކްޝަންސް ކޮމިޝަނަށް މައްސަލަ ހުށަހަޅާނެކަމަށް ބުނެފިއެވެ.
އެމްޑީޕީން ނެރުނު ބަޔާނުގައި ފާހަގަކޮށްފައިވާ ގޮތުގައި، އެ ޕާޓީގެ އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް، ޕީއެންސީއަށް ވަނުމަށް އެއްވެސް ފޯމެއް ފުރާފައި ނުވަނީސް، އެމްޑީޕީގެ ދަފްތަރުން އުނިކޮށް ޕީއެންސީގެ ދަފްތަރަށް ބަދަލުކޮށްފައިވާ ކަމަށް ބުނެއެވެ.
ޕީއެންސީގެ ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް އެއް ލައްކަ މެމްބަރުން ހަމަކުރުމަށް މަސައްކަތް ކުރަމުންދާއިރު، މީހުންގެ ސޮއި ފޯޖުކޮށްގެން އިލެކްޝަންސް ކޮމިޝަނަށް ފޯމު ހުށަހަޅަމުންދާ ކަމަށް އެމްޑީޕީން ތުހުމަތުކޮށްފައިވެއެވެ. އަދި މިކަން ފޮރުވުމަށް ދައުލަތުގެ ހުރިހާ އިދާރާއަކަށް ނުފޫޒު ފޯރުވަމުންދާ ކަމަށްވެސް ބުނެއެވެ.
މި މައްސަލައިގައި އެމްޑީޕީން ވަނީ ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ޕީއެންސީއަށް މެމްބަރުން އިތުރުކުރަމުންދާ މައްސަލަ ސީރިއަސްކޮށް ބަލައި، ގާނޫނީ ފިޔަވަޅު އެޅުމަށް އިލެކްޝަންސް ކޮމިޝަނަށް ގޮވާލާފައެވެ.
އިލެކްޝަންސް ކޮމިޝަނުގެ ދަފްތަރުގައިވާ ގޮތުން މިވަގުތު އެންމެ ގިނަ މެމްބަރުން ތިބި ޕާޓީއަކީ 50،851 މެމްބަރުންނާއެކު އެމްޑީޕީ އެވެ. އަދި ޕީއެންސީގައި މިވަގުތު ތިބީ 28،983 މެމްބަރުންނެވެ. ނަމަވެސް ޕީއެންސީން ބުނާ ގޮތުގައި މިދިޔަ ނޮވެމްބަރު މަހުގެ ތެރޭގައި އެ ޕާޓީއަށް 97،000 ފޯމު ލިބިފައިވެއެވެ.
