މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޮމްޕެނީ (އެމްއެމްޕީއާރްސީ) އިން ވަނީ އަންނަ އަހަރު ބޭރު ގައުމުތަކުގައި ބާއްވާ ފަތުރުވެރިކަމުގެ ފެއަރތަކުގައި ބައިވެރިވުމަށް ކުރާ ޚަރަދު ކުޑަކޮށް، ޑިޖިޓަލް ކެމްޕެއިންތަކަށް އިސްކަންދޭން ނިންމާފައެވެ.
އެމްއެމްޕީއާރްސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ ޗެއަރޕާސަން އަބްދުﷲ ޤިޔާސް ވިދާޅުވި ގޮތުގައި، ކުރިން އެކުންފުނިން ވަސީލަތްތަކުގެ 80 އިންސައްތަ ބޭނުންކުރަމުން އައީ ޓްރެވެލް ޓްރޭޑް ފެއަރތަކަށެވެ. ނަމަވެސް އަންނަ އަހަރު އެޑްވަޓައިޒިން ވައިރަލް ކެމްޕެއިންތަކާއި، ބީޓުސީ ނެޓްވޯކިން އިވެންޓްސް އަދި އިންޓަނޭޝަނަލް އެއަރލައިންތަކާއި ބްރޭންޑްތަކާ ގުޅިގެން ޑިޖިޓަލީ ޑްރިވެން ކެމްޕެއިންތަކަށް އިސްކަންދޭން ނިންމާފައިވެއެވެ.
ދާދިފަހުން އެ ކުންފުނިން ކުރިއަށް ގެންދިޔަ "އޮންލައިން މިނީ ކެމްޕެއިން" އިން އެއްމަސް ދުވަހުގެ ތެރޭގައި 22 މިލިއަން އިމްޕްރެޝަން ލިބިފައިވާކަމަށް އެކުންފުނިން ފާހަގަކުރިއެވެ. މި ކެމްޕެއިންގެ ކާމިޔާބީއާ ގުޅިގެން، މީސްމީޑިއާގެ އެކި މަންސަތަކާއި ބުކިން ޕްލެޓްފޯމްތަކާ ގުޅިގެން އިތުރު މާކެޓިން ކެމްޕެއިންތައް ކުރިއަށް ގެންދިއުމަށް ވަނީ ރޭވިފައެވެ.
ޤިޔާސް އިތުރަށް ވިދާޅުވި ގޮތުގައި، ޑަބްލިއުޓީއެމް ފެއަރއަށް އެކަނި ބަލާއިރުވެސް 3.5 މިލިއަން ރުފިޔާ ސަލާމަތްކުރެވިފައިވާއިރު، އަންނަ އަހަރު ޓްރޭޑް ޝޯތަކަށް ދާ ޚަރަދުގެ 50 އިންސައްތަ ހަމަޖެހިގެންދާނީ ގެސްޓްހައުސް އެސޯސިއޭޝަން، މަޓާޓޯ، މަޓީ އަދި ލިވަބޯޑު އެސޯސިއޭޝަން ފަދަ އެންޖީއޯތަކުން ކަމަށެވެ.
ރާއްޖޭގެ މައުލޫމާތު ގްލޯބަލް ޑިސްޓްރިބިއުޝަން ސިސްޓަމް (ޖީޑީއެސް) މެދުވެރިކޮށް ގިނަ ބަޔަކު ބަލަމުންދާއިރު، އޭގެ ތެރެއިން ރާއްޖެ ޒިޔާރަތްކުރަނީ އެންމެ 2 އިންސައްތަ ފަތުރުވެރިންނެވެ. މިކަމާ ގުޅިގެން ކޮންމެ ސަރަހައްދެއްގައިވެސް އިތުރަށް މާކެޓު ކުރުމަށް ކުރެވިދާނެ ކަންކަން ދެނެގަތުމުގެ މަސައްކަތް ދަނީ ކުރަމުންނެވެ.
ސަރުކާރުން ވަނީ އަންނަ އަހަރު ފަތުރުވެރިކަމުގެ ސިނާއަތުން ލިބޭ އާމްދަނީ 5 ބިލިއަން ޑޮލަރަށް އިތުރުކުރުމަށާއި، ރާއްޖެ ޒިޔާރަތްކުރާ ފަތުރުވެރިންގެ އަދަދު މިއަހަރަށްވުރެ 15 އިންސައްތަ އިތުރުކުރުމަށް އަމާޒު ކަނޑައަޅާފައެވެ.
