ސަރުކާރުގެ ތިން މިނިސްޓްރީއެއްގައި ރޯވި އަލިފާނުގެ ހާދިސާ ތަހުގީގުކުރުމަށް އިންޑިއާއިން ރާއްޖެ އައި ތަޖުރިބާކާރުންގެ ޓީމު މިމަހުގެ 22 ވަނަ ދުވަހު ވަނީ ފުރާފައެވެ. ފުލުހުން މިއަދު މީޑިއާތަކަށް ފޮނުވި މެސެޖެއްގައި މައުލޫމާތު ދެމުން ބުނެފައިވަނީ، އިންޑިއާގެ ތަޖުރިބާކާރުންގެ ޓީމުން ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފައިވާ ކަމަށެވެ.
އަދި ހާދިސާއާ ގުޅޭ ފޮޓޯއާއި ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައްވެސް ޓީމާ ހިއްސާކުރެވިފައިވާ ކަމަށް ފުލުހުން މައުލޫމާތު ދިނެވެ. މި މައުލޫމާތުތަކާއި ތަކެތި ދިރާސާކުރުމަށްފަހު، ޓީމުގެ ހޯދުންތައް ފުލުހުންނާ ހިއްސާކުރުމަށް ވަނީ ހަމަޖެހިފައެވެ.
އަލިފާނުގެ ހާދިސާ ހިނގީ މިމަހުގެ 12 ވަނަ ދުވަހުގެ ހެނދުނު، ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އަންނަ ގްރީން ބިލްޑިންގައެވެ.
