ރާއްޖެއަށް މަސްތުވާތަކެތި އެތެރެކުރަން އުޅުނު 4 މީހަކު ހައްޔަރު ކޮށްފިއެވެ. ފުލުހުން އިއްޔެ ހައްޔަރުކުރި ހަތަރު މީހުން ރާއްޖެއަށް މަސްތުވާތަކެތި އެތެރެކުރަން އުޅެފައިވަނީ ދެ ގޮތަކަށެވެ. އެއީ ދިރުވާލައިގެންނާއި އަދި އަނެއް ބަޔަކު ބޮކްސާއާއި އިސްޓާކީނު ތެރޭގައި ފޮރުވައިގެންނެވެ.
ދިރުވާލައިގެން މަސްތުވާތަކެތި އެތެރެކުރަން އުޅުނު ދެމީހުންގެ ތެރެއިން އެކަކީ ނ. މަނަދޫ، ޕީކޮކް އިހްސާން އިސްހާގެވެ. އޭނާ ބޮޑުކަމުދިޔައިރު އަށް ބުލެޓް ފެނުނު އިރު، އޭގެ ޖުމްލަ ބަރުދަނަކީ 124 ގްރާމެވެ. އަދި އޭނާގެ ކުޑަކަމުދާ ތަކެތިން މަސްތުވާތަކެއްޗަށް ޕޮޒިޓިވްވެފައިވެއެވެ. ދެވަނަ މީހަކީ ހ. ޕްރިމްރޯސް، މުހައްމަދު ފާރިޝް (40 އަހަރު) އެވެ. އޭނާ ބޮޑުކަމުދިޔައިރު އެއް ބުލެޓް ފެނުނެވެ. އަދި ހައްޔަރުކުރި އިރު ހުރީ މަސްތުވެފައެވެ. މި ދެމީހުންވެސް 30 ދުވަހަށް ބަންދުގައި ބެހެއްޓުމަށް ކޯޓުން އަމުރުކޮށްފައިވެއެވެ.
އަނެއް ދެމީހުންނަކީ ލ. ގަން، ޗާންދަނީވިލާ މުހައްމަދު ޝަފުރާނާއި ލ. ކަލައިދޫ، އެވަލާސްޓް، އިބްރާހިމް ފައިސަލެވެ. މި ދެމީހުން ލައިގެން ހުރި ބޮކްސާ ތެރެއިންނާއި ދެފައިގެ އިސްޓާކީނު ތެރެއިން މަސްތުވާތަކެތި ހުރި ރަބަރު ޕެކެޓް ފެނިފައިވެއެވެ. މި ދެމީހުން 15 ދުވަހަށް ބަންދުގައި ބެހެއްޓުމަށް ކޯޓުން އަމުރުކޮށްފައިވެއެވެ.
