އިންޓެލިޖެންސް މައުލޫމާތުގެ މައްޗަށް ބިނާކޮށް، ކޯޓު އަމުރު ނަގައިގެން މެންދަމު ގޭގެއަށް ވަދެ ބަލައިފާސްކުރާ އޮޕަރޭޝަންތަކާ މެދު މާލޭ މޭޔަރު އާދަމް އާޒިމް ކަންބޮޑުވުން ފާޅުކޮށްފިއެވެ. މި ކަންބޮޑުވުން ފާޅުކުރައްވާފައިވަނީ "އެކްސް" ގައި ކުރެއްވި ޕޯސްޓެއްގައެވެ.

މި ޕޯސްޓް ކުރައްވާފައިވަނީ ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ އެކައުންޓަކުން ބައެއް އާއްމުންގެ އެކައުންޓްތަކަށް ފައިސާ ޖަމާކުރި މައްސަލަ ބެލުމަށް ފުލުހުން ބުރާސްފަތި ދުވަހުގެ ރޭ މެންދަމު ހަތަރު ގެއެއް ބަލައި ފާސްކޮށް، އިލެކްޓްރޯނިކް ސާމާނުތަކެއް ގެންދިއުމާ ގުޅިގެންނެވެ. މި މައްސަލަ ފުލުހުން ބަލަމުންދާތާ އަހަރަކަށްވުރެ ގިނަ ދުވަސްވެފައިވެއެވެ.

މޭޔަރު އާޒިމް ވިދާޅުވެފައިވަނީ މައިންނާއި ޅަދަރިން ނިދާ ވަގުތުގައި ގޭގެއަށް ވަދެ އާއިލާތަކުގެ ނިދި ގެއްލުވާލައި ފުލުހުން ރޭޑްތައް ހިންގުމުން، އާއިލާތައް ބިރުވެރިކަމުގެ ތެރެއަށް ވައްޓާލެވޭ ކަމަށެވެ. އަދި މިފަދަ ކަންކަން މިއަދު ހިނގާތަން ފެނުމަކީ މާޔޫސްކަން ލިބޭ ކަމެއް ކަމަށާއި، މީގެ ކުރިންވެސް މިފަދަ ހާދިސާތައް ތަޖުރިބާކުރެވިފައިވާ ކަމަށް އޭނާ ވިދާޅުވިއެވެ.

އަމިއްލައަށް އުފައްދާ އިންޓެލިޖެންސް ރިޕޯޓާއި ފްރޭމްކުރުމަށް ހެކި ބަހައްޓައިގެން ކުރިން ހިންގި ރޭޑްތަކުން އެތައް އާއިލާތަކަކަށް އަނިޔާއާއި ހިތާމަ ބޭއިންސާފުން ލިބިފައިވާ ކަމަށާއި، މިފަދา ބޮޑެތި ޖަރީމާތައް ހިންގި ފަރާތްތައް މިއަދާ ހަމައަށްވެސް އިންސާފުގެ ކުރިމައްޗަށް ގެނެވިފައިނުވާ ކަމަށް އާޒިމް ފާހަގަކުރެއްވިއެވެ.

މީގެއިތުރުން، މިއަދު ލިބިފައިވާ ބާރު ބަދަލުހިފުމުގެ ވަސީލަތެއްގެ ގޮތުގައި ބޭނުންކުރުމުން ދުރުހެލިވެ ތިބުމަށް ފުލުހުންގެ މުއައްސަސާއަށް ހަނދާންކޮށްދެއްވިއެވެ. އަދި މާލޭގެ މޭޔަރުގެ ހައިސިއްޔަތުން، މިއަދު މާލޭގެ ރައްޔިތުންނަށް އަމާންކަމާއި ރައްކާތެރިކަން ނެތްކަމުގެ އިހްސާސް އިންތިހާއަށް ކުރެވޭ ވާހަކަ ހިތާމައާއެކު ދެންނެވިއެވެ.

ފުލުހުން ބުރާސްފަތި ދުވަހުގެ ރޭ ދަންވަރު ކޯޓު އަމުރެއްގެ ދަށުން ބަލައި ފާސްކުރި ތަންތަނުގެ ތެރޭގައި އާރުޑީސީގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ)ގެ މާލޭ އެޕާޓްމަންޓާއި، އޭނާގެ ކުރީގެ އަނބިކަނބަލުންގެ ހުޅުމާލޭ އެޕާޓްމަންޓު އަދި އާރުޑީސީގެ ކުރީގެ ސީއެފްއޯ ޔާސިރު ހަސަންއަށް ނިސްބަތްވާ ދެ ތަނެއް ހިމެނެއެވެ. މި މައްސަލަ ފުލުހުންނަށް ހުށަހެޅިފައިވަނީ 2022 ވަނަ އަހަރުގެ ސެޕްޓެމްބަރު މަހުގައެވެ. މި ބަލައި ފާސްކުރުންތައް ކުރިއަށް ގެންގޮސްފައިވަނީ ސަރުކާރުގެ ވައްކަމާއި ހިޔާނާތުގެ މައްސަލަތައް ފެންމަތިވެ، ރައްޔިތުންގެ ފާޑުކިޔުންތައް އިތުރުވެފައިވާ ދަނޑިވަޅެއްގައެވެ.