ދެކުނު ކޮރެއާގެ ނޭޝަނަލް އެސެމްބްލީން، އެގައުމުގެ ވަގުތީ ރައީސް ހަން ޑަކް ސޫ ގެ އިތުބާރު ނެތްކަމުގެ ވޯޓެއް ނަގައި، އޭނާ މަގާމުން ވަކިކޮށްފައެވެ. އިތުބާރު ނެތްކަމުގެ ވޯޓު ފާސްވުމަށް 151 ވޯޓު ބޭނުންވިއިރު، މަޖިލީހުގެ 192 މެންބަރުން ވަނީ ހަން މަގާމުން ވަކިކުރުމަށް ވޯޓުދީފައެވެ.
މިއީ އެގައުމުގައި އެންމެ މަސްދުވަހުގެ ތެރޭގައި މަގާމުން ވަކިކުރެވުނު ދެވަނަ ރައީސެވެ. ކުރިން ބޮޑުވަޒީރުގެ މަގާމުގައި ހުންނެވި ހަން، ވަގުތީ ރައީސްގެ މަގާމަށް އައްޔަންކުރެވުނީ މިމަހުގެ 3 ވަނަ ދުވަހު އޭރުގެ ރައީސް ޔޫން ސުކް ޔޮލް ގެ އިތުބާރު ނެތްކަމުގެ ވޯޓެއް ނެގުމާ ގުޅިގެންނެވެ. ހަން މަގާމުން ވަކިކުރެވުނީ ޔޫން މަގާމުން ވަކިކުރުމުގެ މަރުހަލާތަކަށް ހުރަސްއަޅަމުން ދިޔަކަމުގެ ތުހުމަތުގައެވެ.
ދެކުނު ކޮރެއާގައި ޑިމޮކްރެޓިކް ވެރިކަމެއް ފެށުނީއްސުރެ ވަގުތީ ރައީސަކު މަގާމުން ވަކިކުރެވުނީ މިއީ ފުރަތަމަ ފަހަރެވެ. މިހާރު ހުސްވެފައިވާ ވަގުތީ ރައީސްގެ މަގާމާ ހަވާލުވެވަޑައިގަންނަވާނީ އެގައުމުގެ ފައިނޭންސް މިނިސްޓަރު ޗޮއި ސަންގް މޮކް އެވެ.
