ކުރީގެ ރައީސް ނަޝީދުގެ ވެރިކަން ބަދަލުވުމާ ގުޅިގެން ހިނގި ހަމަނުޖެހުންތަކުގައި ފުލުހެއްގެ ސައިކަލެއްގައި ރޯކޮށްލުމުގެ މައްސަލައިގައި 15 އަހަރުގެ ޖަލު ހުކުމެއް އިއްވާފައިވާ ހ. ރެދަން ފަވާޒް ކަޅުތުއްތު އިތުރު ކުށެއްގައި ހައްޔަރުކުރެވިއްޖެއެވެ.
ފަވާޒް ކަޅުތުއްތު މިފަހަރު ހައްޔަރުކުރެވުނީ ސައިކަލެއް ވަގަށް ނެގުމުގެ ތުހުމަތުގައެވެ. މި މައްސަލައިގައި އޭނާގެ ބަންދު މުއްދަތު 15 ދުވަހަށް އިތުރުކޮށްފައިވެއެވެ. ފަވާޒް ކަޅުތުއްތުގެ ކުށުގެ ރެކޯޑަށް ބަލާއިރު، އޭނާ ވަނީ މަސްތުވާތަކެއްޗާއި، ވައްކަމާއި، ފޭރުން ފަދަ އެކި ބާވަތުގެ ޖިނާއީ މައްސަލަތަކުގައި ތަކުރާރުކޮށް ހައްޔަރުކުރެވިފައެވެ.
2012 ވަނަ އަހަރުގެ ޖޫން މަހު، ރައީސް ވަޙީދު ޙަސަން މަނިކުގެ ފުރަތަމަ ރިޔާސީ ބަޔާން އިއްވެވުމާ ދިމާކޮށް އެމްޑީޕީން ބޭއްވި މުޒާހަރާގައި ފުލުހެއްގެ ސައިކަލެއްގައި ރޯކޮށްލި މައްސަލައިގައި ޓެރަރިޒަމްގެ ދަޢުވާ އުފުލި، 2012 އޯގަސްޓް 30 ގައި ފަވާޒް ކަޅުތުއްތުގެ މައްޗަށް 15 އަހަރުގެ ޖަލު ހުކުމެއް ކުރެވުނެވެ.
މި ހުކުމް އިސްތިއުނާފު ކުރުމުން، 2013 ވަނަ އަހަރުގެ ޖޫން މަހު ހައިކޯޓުން ވަނީ އެ ހުކުމަށް ތާއީދުކޮށްފައެވެ.
