ފެނަކަ ކޯޕަރޭޝަންގެ މައްޗަށް ސިވިލް ކޯޓުން އައު ހުކުމެއް ކޮށްފިއެވެ. މި ހުކުމުގެ ދަށުން، އެލްއެފް ކޮންސްޓްރަކްޝަންސް ޕްރައިވެޓް ލިމިޓެޑަށް 7.9 މިލިއަން ރުފިޔާ ދެއްކުމަށް ފެނަކައަށް އަމުރުކޮށްފައިވެއެވެ. މި ފައިސާ ހިމެނެނީ އެލްއެފްއިން ފެނަކައަށް ކޮށްދީފައިވާ މަސައްކަތްތަކަށާއި، ވިއްކާފައިވާ މުދަލަށް އަރާ 7.8 މިލިއަން ރުފިޔާއާއި، މައްސަލަ ކޯޓަށް ހުށަހެޅުމަށް ހިނގި ޤާނޫނީ ހަރަދުގެ ގޮތުގައި 40,000 ރުފިޔާއެވެ.
2019 އާއި 2022 އާ ދެމެދު އެލްއެފްއިން ވަނީ ފެނަކައަށް 12 އެކި މަސައްކަތް ކޮށްދީފައެވެ. މީގެ ތެރޭގައި ވަށާފާރު ރޭނުމާއި، އޮފީސް އިމާރާތްކުރުމާއި، ފިނިގެ އަދި އިންޖީނުގެ ފަދަ ތަންތަން އިމާރާތްކުރުމާއި، ޗިމްނީ ހެދުމުގެ މަސައްކަތްތައް ހިމެނެއެވެ. މީގެ އިތުރުން، 37 އެކި އިންވޮއިސްގެ ދަށުން ވިއްކާފައިވާ ތަކެތީގެ ފައިސާވެސް ނުލިބި ވެއެވެ.
ސިވިލް ކޯޓުން ކަނޑައަޅާފައިވާ ގޮތުން، ފެނަކައިން މި ފައިސާ ދައްކަންޖެހޭނީ 25 ޑިސެމްބަރުން ފެށިގެން 15 ދުވަހުގެ ތެރޭގައި، އެބަހީ ޖެނުއަރީ 8 ގެ ކުރިންނެވެ.
މި ހުކުމް އައިސްފައިވަނީ ފެނަކައާ ގުޅުންހުރި ހިޔާނާތުގެ މައްސަލަތަކެއް އޭސީސީއާއި ފުލުހުން ތަހުގީގުކުރަމުންދާ ދަނޑިވަޅެއްގައެވެ. އެގޮތުން، ފެނަކައިގެ ކުރީގެ މެނޭޖިންގ ޑިރެކްޓަރު އަހުމަދު މުހައްމަދު ސައީދު އާއި ކުރީގެ ޕްރޮކިއުމަންޓް ހެޑު މަރިޔަމް ދީނާ ސާލިހުގެ މައްޗަށް ޕްރޮސިކިއުޓަރ ޖެނެރަލްގެ އޮފީހުން ވަނީ ދައުވާކުރަން އެދި ކްރިމިނަލް ކޯޓަށް ފޮނުވާފައެވެ.
މި ދެ ފަރާތުގެ މައްޗަށް ދައުވާ އުފުލާފައިވަނީ 2018 ވަނަ އަހަރު ބްލޭޒަން އިންކް ޕްރައިވެޓް ލިމިޓެޑާއެކު ވެފައިވާ އެއްބަސްވުމެއްގެ ދަށުން، މަސައްކަތް ފުރިހަމަނުކޮށް އަދި ނިންމިކަން ކަށަވަރުނުކޮށް 848,000 ރުފިޔާ އެ ކުންފުންޏަށް ދޫކޮށް، ނާޖާއިޒު މަންފާ ހޯދައިދިނުމުގެ ތުހުމަތުގައެވެ. މި މައްސަލައިގައި ދެ ފަރާތުގެ މައްޗަށްވެސް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އުފުލާފައިވާއިރު، އަސާސީ އަދަބެއްގެ ގޮތުގައި 1 އަހަރާއި 7 މަހާއި 6 ދުވަހުގެ ޖަލު ހުކުމަކަށް ޕްރޮސިކިއުޓަރ ޖެނެރަލްގެ އޮފީހުން ވަނީ އެދިފައެވެ.
ފާހަގަކޮށްލެވޭ ކަމަކީ، މިހާރުގެ ސަރުކާރުން ފެނަކައާ ހަވާލުވިއިރު، ކުންފުނީގެ ދަރަނި 4.3 ބިލިއަން ރުފިޔާގައި އޮތްކަމެވެ.
ކޮމެންޓު ފޮނުވާ