ޕީޕަލްސް ނެޝަނަލް ފްރޮންޓް (ޕީއެންއެފް) އިން އަންނަ ޖެނުއަރީ މަހުގެ 10 ވަނަ ދުވަހު ބޭއްވުމަށް ނިންމާފައިވާ ގައުމީ ޖަލްސާގެ ތައްޔާރީތައް ވާން ފަށައިފިއެވެ. ނަމަވެސް، އަދިވެސް ޖަލްސާ ބާއްވާނެ ތަނެއް ކަނޑައަޅާފައި ނުވާކަމަށް އެ ޕާޓީގެ ފަރާތުން މައުލޫމާތު ދިން އޮފިޝަލަކު ވިދާޅުވެފައި ވެއެވެ.
އެނގިފައިވާ ގޮތުގައި ޕީއެންއެފް އުފެއްދުމުގެ ޖަލްސާގައި ހިނގި ހަމަނުޖެހުންތަކަށްފަހު، މިފަހަރު ޖަލްސާ ބޭއްވުމަށް ރޭވިފައިވަނީ ސެކިއުރިޓީ ވަރުގަދަ ތަނެއްގައެވެ. އެ ޕާޓީ އުފެއްދުމަށް ޢުޔާސުއްދީން ސްކޫލު ހޯލުގައި ބޭއްވި ޖަލްސާ ސްކޫލު ހޯލުގައި ބޭއްވުން އޭރު މަނާކުުރުމާއި ގުޅިގެން އެޕާޓީ އުފެއްދި ޖަލްސާ ބާއްވާފައިވަނީ ލޮނުޒިޔާރަތްކޮޅުގައެވެ.
މިއީ ޕާޓީގެ އަސާސީ ގަވާއިދުގައިވާ ގޮތުން، އަހަރު ފުރުމުގެ ކުރިން ބާއްވަންޖެހޭ ޖަލްސާއެކެވެ. އަތޮޅުތެރެއިން ވެސް މެންބަރުން މި ޖަލްސާއަށް ގެނައުމަށް ވަނީ ނިންމާފައެވެ.
ރައީސް މުއިއްޒުގެ ވެރިކަމާމެދު ހިތްހަމަނުޖެހޭ ސިޔާސީ ބޭފުޅުން ޕީއެންއެފާ ގުޅުމަށް ތައްޔާރުވަމުންދާ ކަމަށް އެޕާޓީގެ ފަރާތުން ބުނެއެވެ.
