އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންގް އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ދަންނަވައިފިއެވެ. ކޮންގްރެސްގެ އިސް ލީޑަރު މަންމޯހަން ސިންގް ސިއްހީ ހާލުކޮޅު ގޯސްވުމާ ގުޅިގެން އެއިމްސް ދިއްލީގައި ރޭ 8:00 ހާއިރު އެޑްމިޓްކުރެވުނެވެ. އަދި ފަރުވާ ދެމުން ދަނިކޮށް އެމަނިކުފާނު ވަނީ އަވަހާރަވެފައެވެ.
ރައީސް މުއިއްޒު ކުރެއްވި ޓްވީޓެއްގައި ދިވެހި ރައްޔިތުންނާއި، އަމިއްލަ ނަންފުޅުގައި، އިންޑިއާގެ ރައްޔިތުންނާ އެކީގައި ހިތާމަކުރައްވާ ކަމަށް ވިދާޅުވެފައިވެއެވެ. އަދި 2011 ވަނަ އަހަރުގެ ނޮވެމްބަރު މަހުގައި ޑރ. މަންމޯހަން ސިންގް ރާއްޖެއަށް ކުރެއްވި ތާރީޚީ ދަތުރުފުޅަކީ، ދިވެހިރާއްޖޭގެ އިޤްތިޞާދީ އަދި އިޖްތިމާޢީ ކުރިއެރުމަށް ލިބުނު ވަރަށް ބޮޑު ކުރިއެރުމެއްގެ ގޮތުގައި ފާހަގަކުރައްވާފައިވެއެވެ.
ރައީސް މުއިއްޒު އިތުރަށް ވިދާޅުވެފައިވަނީ، ސިންގްގެ ލީޑަރޝިޕްގެ ދަށުން "ލުކް އީސްޓް ޕޮލިސީ" ހަރުދަނާ ކުރެއްވުމަށް ކުރެއްވި މަސައްކަތްތަކަކީ ދެކުނު އޭޝިއާ ސަރަޙައްދުގެ އެކި ކަންކޮޅުތަކުގައި ތަރައްޤީއާއި އެއްބާރުލުން އިތުރުކުރުމުގައި ވަރަށް މުހިންމު ދައުރެއް އަދާކުރި ކަމެއް ކަމަށެވެ. މި ހިތާމަވެރި ދަނޑިވަޅުގައި މަންމޯހަން ސިންގްގެ ޢާއިލާއަށާއި، އިންޑިއާގެ ރައްޔިތުންނަށް ވަރަށް އިޚްލާޞްތެރިކަމާއެކު ތަޢުޒިޔާ ދަންނަވާފައިވެއެވެ.
2004 އިން 2014 އަށް އިންޑިއާގެ ބޮޑުވަޒީރުކަން ކުރެއްވި ޑރ. މަންމޯހަން ސިންގްއަކީ އޭނާގެ ވެރިކަމުގެ ދައުރުގައި އިންޑިއާގެ އިޤްތިޞާދީ ކުރިއެރުމަށް ގިނަގުނަ މަސައްކަތްތަކެއް ކުރެއްވި އަދި ދެކުނު އޭޝިއާ ސަރަޙައްދުގެ ޤައުމުތަކާއެކު ގުޅުން ބަދަހިކުރުމަށް މުހިންމު މަސައްކަތްތަކެއް ކުރެއްވި ބޭފުޅެކެވެ.
