އަހަރީ ޕްރޮކިއުމަންޓް ޕްލޭންތައް އަންނަ ޖެނުއަރީ މަހުގެ 16 ގެ ކުރިން ހުށަހެޅުމަށް ފިނޭންސް މިނިސްޓްރީން ސަރުކާރުގެ އޮފީސްތަކަށް އަންގައިފިއެވެ. މިކަން އަންގާފައިވަނީ އިއްޔެ އެމިނިސްޓްރީން ނެރުނު ސާކިއުލާއެއްގައެވެ.
މި ޕްލޭންތައް ހުށަހަޅަންޖެހޭނީ ބަނޑޭރި ޕޯޓަލް މެދުވެރިކޮށެވެ. އަދި މިނިސްޓްރީގެ ވެބްސައިޓުގައި އެ ޕްލޭންތައް އާންމުކޮށް ފެންނާނެހެން ޝާއިއުކުރެވޭނެއެވެ. ލޯކަލް ކައުންސިލްތަކުގެ ޕްރޮކިއުމަންޓް ޕްލޭންތައް ހުށަހެޅުމަށް ވަކި މުއްދަތެއް ދީފައިވާއިރު، އެ މުއްދަތު ހަމަވާނީ ޖެނުއަރީ 26 ވަނަ ދުވަހުއެވެ.
މާލިއްޔަތު ގަވާއިދުގެ ދަށުން، ދައުލަތުގެ ބަޖެޓުން ހިންގާ ހުރިހާ އިދާރާއަކުން މި ޕްލޭންތައް ތައްޔާރުކުރުން ލާޒިމުވެއެވެ. މިކަމަށް އެހީތެރިވުމުގެ ގޮތުން، ފިނޭންސް މިނިސްޓްރީން ވަނީ ޕްރޮކިއުމަންޓް ޕްލޭން މޮޑިއުލް ބޭނުންކުރާނެ ގޮތުގެ އިރުޝާދުތައް ހިމެނޭ ޔޫސާ ގައިޑްލައިނެއް އާންމުކޮށްފައެވެ.
މި އެންގުން އަންގާފައި މިވަނީ ކޮރަޕްޝަނުގެ ބައެއް މައްސަލަތައް ފެންމަތިވެފައިވާ ދަނޑިވަޅެއްގައެވެ. މީގެ އިތުރުން، ސަރުކާރު ހިއްސާވާ ކުންފުނިތަކުން މިނިސްޓްރީގެ ހުއްދަ ނެތި ލޯނު ނުނެގުމަށް ވެސް މި ހަފުތާގައި އަންގާފައިވެއެވެ.
