ޓްރާންސްޕޯޓް މިނިސްޓްރީން ޑޮމެއިންގެ ހިދުމަތަށް އަލަށް ތައާރަފުކުރެވުނު ޑޮމެއިން ރަޖިސްޓަރީ ސެޓްފިކެޓް ދޫކުރަން ފަށައިފިއެވެ. މިގޮތުން އެންމެ ފުރަތަމަ ޑޮމެއިން ލިބުނު ފަރާތަށް ސެޓްފިކެޓް ހަވާލުކޮށްދެއްވީ ޓްރާންސްޕޯޓް މިނިސްޓަރު މުހައްމަދު އަމީންއެވެ.
މިނިސްޓްރީން މައުލޫމާތު ދެއްވި ގޮތުގައި މި އަލަށް ތައާރަފުކުރެވުނު ސެޓްފިކެޓަކީ ޑޮމެއިން ރަޖިސްޓްރޭޝަންގެ ސައްހަކަން ކަށަވަރުކުރެވޭނެ ސެކިއުރިޓީ ފީޗާތަކެއް ހިމެނޭ ލިޔުމެކެވެ. ޑޮމެއިން ހިދުމަތުގެ ސެކިއުރިޓީ ހަރުދަނާކުރުމުގެ ބޭނުމުގައި އައު ސެކިއުރިޓީ ފީޗާތަކާއެކު ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ ތައާރަފްކުރުމަށް މިނިސްޓްރީން ނިންމާފައިވަނީ ދާދިފަހުންނެވެ.
ޓްރާންސްޕޯޓް މިނިސްޓްރީން އަންގަވާފައިވާ ގޮތުގައި، ނޮވެމްބަރު 17 އިން ފެށިގެން 60 ދުވަހުގެ ތެރޭގައި ކުރިން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ ނުވަތަ ފައިސާ ދެއްކި ކަމުގެ ރަސީދު މިނިސްޓްރީއަށް ހުށަހަޅަންޖެހެއެވެ. އަދި މި ލިޔެކިޔުންތައް ހުށަހެޅުމަށްފަހު، އަލަށް ތައާރަފްކުރާ ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދައަށް ބަދަލުކުރުމަށް މިނިސްޓްރީން އިލްތިމާސްކޮށްފައިވެއެވެ.
މިނިސްޓްރީން އިތުރަށް ހާމަކުރެއްވި ގޮތުގައި، 17 ނޮވެމްބަރުން ފެށިގެން 60 ދުވަސް ހަމަވުމަށްފަހު، "އެއްގަމު އުޅަނދުގައި ޑޮމެއިން ބޭނުންކުރުމުގެ ގަވައިދު"ގެ ޖަދުވަލު 1 ގައި ބަޔާންކޮށްފައިވާ ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ އެކަނި ބަލައިގަނެވޭނެއެވެ.
