ބިންވެރިޔާ ސްކީމްގެ ދަށުން ނުހައްގުން ގޯތި ދޫކުރި މައްސަލައިގެ ތަހުގީގަށް ފުރިހަމަ އެއްބާރުލުން ދިނުމަށް އެ މިނިސްޓްރީގެ މުވައްޒަފުންނަށް ހައުސިންގ މިނިސްޓަރު ޑރ. އަލީ ހައިދަރު އަންގަވައިފިއެވެ.
މިނިސްޓަރު މުވައްޒަފުންނަށް ފޮނުވި މެމޯގައި، ތަހުގީގާ ގުޅުންހުރި އެއްވެސް ލިޔެކިޔުމެއް ނައްތާނުލުމަށާއި، ޑޭޓާތަކަށް އެއްވެސް ބަދަލެއް ނުގެނައުމަށް އަންގަވާފައިވެއެވެ. އަދި މީގެ އިތުރުން، ތަހުގީގަށް ހުރަސްއެޅޭފަދަ އެއްވެސް ކަމެއް ނުކުރުމަށާއި، ތަހުގީގު ފަރާތްތަކަށް ތެދު މައުލޫމާތު ފޯރުކޮށްދިނުމަށްވެސް އިރުޝާދު ދެއްވާފައިވެއެވެ.
މި މައްސަލައިގެ ތަހުގީގުގެ ތެރެއިން މިހާތަނަށް ހައުސިންގ މިނިސްޓްރީގެ 9 މުވައްޒަފަކު ވަނީ ސަސްޕެންޑް ކުރެވިފައެވެ. މީގެ ތެރޭގައި ސްޓޭޓް މިނިސްޓަރުންނާއި، ޑެޕިއުޓީ މިނިސްޓަރުންނާއި އަދި ޕޮލިޓިކަލް ޑިރެކްޓަރުން ހިމެނެއެވެ.
ފުލުހުން ހާމަކުރި ގޮތުގައި މި މައްސަލައިގައި މިހާތަނަށް ތިން ގޯއްޗެއް ނުހައްގުން ދޫކޮށްފައިވާކަން ވަނީ ފާހަގަކުރެވިފައެވެ. މި މައްސަލަ ތަހުގީގު ކުރަމުން ގެންދަނީ ޕްރޮސެކިއުޓަރ ޖެނެރަލްގެ އެންގެވުމުގެ މަތިން އެންޓި ކޮރަޕްޝަން ކޮމިޝަނާއި ފުލުހުންގެ ޚިދުމަތުންނެވެ.
