ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އާ މެނޭޖިން ޑިރެކްޓަރެއް އައްޔަންކުރުމާ ގުޅިގެން، އެ ކުންފުނީގެ ޑިރެކްޓަރުންގެ ބޯޑުގެ ހުރިހާ މެންބަރުންގެ ސަސްޕެންޝަން ވަނީ އުވާލާފައެވެ.
އެޗްޑީސީގެ ބޯޑުގެ މެމްބަރުން ސަސްޕެންޑްކުރީ އެކުންފުނީގެ ކުރީގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދުގެ އެއްބަނޑު އެއްބަފާ ބޭބެ މުހައްމަދު ފަޒީލް ރަޝީދަށް، "ބިންވެރިޔާ" ސްކީމްގެ ލިސްޓުގައި ނަން ނެތި ހުޅުމާލެއިން ގޯއްޗެއް ދިން މައްސަލައާ ގުޅިގެންނެވެ. މި މައްސަލައިގައި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަނީ މިދިޔަ ބުރާސްފަތި ދުވަހު، އެޗްޑީސީގެ ޗެއާމަން އަހުމަދު ނާސިފް ފިޔަވައި އެހެން ހުރިހާ ބޯޑު މެންބަރުން ސަސްޕެންޑްކޮށްފައެވެ. އެއީ ފުލުހުންގެ ތަހުގީގަށް ފުރިހަމަ އެއްބާރުލުން ދިނުމަށް ނިންމި ނިންމުމެއްގެ ގޮތުގައި ޕީސީބީން ބުނެފައިވެއެވެ.
މައްސަލައިގެ ތަހުގީގު ކުރިއަށްދަނިކޮށް، މިދިޔަ ހޮނިހިރު ދުވަހު ފަޒުލް ރަޝީދު ވަނީ މަގާމުން އިސްތިއުފާ ދީފައެވެ. އޭނާގެ އިސްތިއުފާއާ ގުޅިގެން، އާދިއްތަ ދުވަހު ސަރުކާރުން ހުށަހެޅި ނަމަކަށް ޕީސީބީން ވަނީ ރުހުން ދީ، ކުރީގެ ވަޒީރު މައުރޫފް ޖަމީލް އެޗްޑީސީގެ މެނޭޖިން ޑިރެކްޓަރުކަމަށް އައްޔަންކޮށްފައެވެ.
އަދި އާ މެނޭޖިން ޑިރެކްޓަރެއް އައްޔަންކުރުމާ ގުޅިގެން، ބޯޑު މެންބަރުންގެ ސަސްޕެންޝަން އުވާލާފައިވާ ކަމަށް ޕީސީބީން ވަނީ ހާމަކޮށްފައެވެ.
