އުމްރާއަށް މީހުން ގެންދާ ގްރޫޕްތަކުން މިނިސްޓްރީއާ ހިއްސާކުރަންޖެހޭ މައުލޫމާތު ފުރިހަމަ ހިއްސާ ނުކުރާނަމަ، އެފަރާތްތަކާ މެދު ފިޔަވަޅު އަޅާނެކަމަށް އިސްލާމިކް މިނިސްޓްރީން ބުނެފިއެވެ. އުމްރާއަށް މީހުން ގެންދިއުމުގައި އަމަލުކުރުމަށް ގެޒެޓްކޮށްފައިވާ އުސޫލުތަކާއި ކުންފުނިތަކުން މިނިސްޓްރީއާއެކު ވެފައިވާ އެއްބަސްވުންތަކާ ހިލާފުވާ ފަރާތްތަކަށް ގަވާއިދުގައިވާ ގޮތުގެ މަތިން ފިޔަވަޅު އެޅޭނެކަމަށް މިނިސްޓްރީން ބުނެއެވެ.
މީގެ އިތުރުން، އުސޫލުގެ 19 ވަނަ މާއްދާގައި ބަޔާންކޮށްފައިވާ ގޮތަށް މައުލޫމާތު ދިނުމާއި އުމްރާ ދަތުރު ރިޕޯޓު ހުށަނާޅާ ފަރާތްތަކާ މެދުވެސް ފިޔަވަޅު އެޅުމަށް ހަމަޖެހިފައިވެއެވެ. އަދި އުސޫލާ ހިލާފުވާ ފަރާތްތަކުގެ ހުއްދަ ބާތިލުކުރެވިދާނެކަމަށާއި، އުމްރާވެރިންގެ ހައްގުތައް ހިމާޔަތްކުރުމަށް ކުރަންޖެހޭ އެންމެހައި ކަންކަން މިނިސްޓްރީން ކުރިއަށް ގެންދާނެކަމަށްވެސް އިއުލާންކޮށްފައިވެއެވެ.
އުސޫލުގައި ބަޔާންކޮށްފައިވާ ގޮތުން، އުމްރާ ދަތުރު ފެށުމުގެ ފަސް ދުވަސް ކުރިން، ދަތުރު ހަމަޖެހިފައިވާގޮތާއި، ދަތުރުވެރިންގެ މައުލޫމާތާއި، ޓިކެޓް އަދި ވިސާގެ އިތުރުން ތިބުމުގެ އިންތިޒާމުތަކާއި، އުމްރާވެރިންނާ ހަވާލުވާ ފޯކަލް ޕޮއިންޓުގެ މައުލޫމާތު މިނިސްޓްރީއަށް ހުށަހަޅަންޖެހެއެވެ. މީގެ އިތުރުން ދަތުރު ނިންމާފައި ރާއްޖެ އައުމަށްފަހު ފަސް ދުވަހުގެ ތެރޭގައި އުމްރާ ދަތުރު ރިޕޯޓު ތައްޔާރުކޮށް މިނިސްޓްރީއަށް ހުށަހަޅަންޖެހެއެވެ. އަދި އުމްރާ ދަތުރުގެ ޚަރަދުގެ ތަފްސީލު މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަދި އިސްލާމިކް މިނިސްޓްރީއަށް ހުށަހަޅަންޖެހެއެވެ.
މީގެ ކުރިން އުމްރާއަށް މީހުން ގެންގޮސް ތާށިކުރުމާއި، ދަތުރުގެ ތެރެއިން އުމްރާވެރިންގެ އިންތިޒާމްތައް ހަމަޖެއްސުމުގައި އިހުމާލުވުމުގެ މައްސަލަތައް ފާހަގަކުރެވިފައިވާތީ، މިނިސްޓްރީން ވަނީ އުމްރާއަށް މީހުން ގެންދާ ގްރޫޕްތައް މޮނިޓަރކުރުމުގެ މަސައްކަތް އިތުރަށް ހަރުދަނާކުރުމަށް މުހިންމު ފިޔަވަޅުތަކެއް އަޅާފައެވެ.
