ފުލުހުންނާ ޙަވާލުކުރެވުނު ސޯމާލިއާގެ ތިން މީހުންނާމެދު ތަޙުޤީޤު ފަށައިފިއެވެ. އެއީ އިއްޔެ ފުވައްމުލަކު ސަރަޙައްދުން އަތުލައިގަތް ޑިންގީއެއްގައި ތިބި މީހުންނެވެ. ފުލުހުން ބުނާގޮތުގައި މިއީ ކަނޑުމަތިން ބެހިގެން އައި ކަމަށް ބެލެވޭ އުޅަނދެއްގައި ތިބި ބައެކެވެ.
ފުވައްމުލައް ސިޓީ ކައުންސިލްގެ ޑެޕިއުޓީ މޭޔަރު، މުޙައްމަދު ފިކުރީ ބައެއް މީޑިއާތަކަށް މައުލޫމާތު ދެއްވަމުން ވިދާޅުވިގޮތުގައި އެ ތިން މީހުން ވަގުތުން ފުލުހުންގެ ބެލުމުގެ ދަށަށް ގެންދެވުނެވެ. ފުލުހުން މިއަދު ހާމަކުރިގޮތުގައި މިހާރު އެ މީހުން ތިބީ ފުލުހުންގެ ބެލުމުގެ ދަށުގައެވެ. އަދި މި މައްސަލައާ ގުޅޭގޮތުން ގުޅުންހުރި އިދާރާތަކާއެކު މަޢުލޫމާތު ހިއްސާކޮށް، އަޅަންޖެހޭ ފިޔަވަޅުތައް އަޅަމުން ގެންދެއެވެ.
އެމްއެންޑީއެފްގެ މަޢުލޫމާތުގައިވާގޮތުން، ފުވައްމުލަކު ސިޓީގެ ހުޅަނގު އުތުރުން 10 މޭލު ހާ ދުރުން ޝައްކުކުރެވުނު މި ޑިންގީ އިއްޔެ ވަނީ ކޯސްޓްގާޑުގެ ބެލުމުގެ ދަށަށް ގެނެވިފައެވެ. އެ ސަރަޙައްދު ބަލައި ފާސްކުރުމުން އެނގުނުގޮތުގައި އެއީ ސޯމާލިއާގެ މީހުން ބޭނުންކުރާ ބާވަތުގެ "ސްކިފް" އެކެވެ.
މިކަހަލަ ޑިންގީތަކުގައި ދަތުރުކުރާ ސޯމާލިއާގެ މީހުން ކުރިންވެސް ވަނީ ރާއްޖޭގެ ސަރަޙައްދުން އަތުލައިގަނެވިފައެވެ.
