މަރުވި ނޭޕާލްގެ އަންހެނެއް ކަމަށްވާ 25 އަހަރުގެ ކަންޗަން ދުންގެލްއަށް ޖިންސީ ގޯނާކޮށްފައި ނުވާކަން ފުލުހުން ކަށަވަރުކޮށްދީފިއެވެ.
ފުލުހުން މިކަން ހާމަކޮށްފައިވަނީ އޭނާއަށް ޖިންސީ ގޯނާކޮށް މަރާލިކަމަށް ބުނެ ސޯޝަލް މީޑިއާގައި ފެތުރެމުންދިޔަ ވާހަކަތަކާ ގުޅިގެންނެވެ.
މައްސަލައާ ގުޅޭގޮތުން ފުލުހުން ހާމަކުރި މަޢުލޫމާތުގައި، މިދިޔަ ނޮވެމްބަރު މަހުގެ ނުވަ ވަނަ ދުވަހުގެ ހެނދުނު އައިޖީއެމްއެޗްގެ އީއާރްއަށް ގެނެވުނު ކަންޗަން ދުންގެލް ވަނީ ހޮސްޕިޓަލަށް ގެންދިޔައިރު ބަނޑުގައި ވަރަށް ބޮޑަށް ރިއްސަމުން ގޮސްފައެވެ. އަދި ހޮސްޕިޓަލަށް ދަތުރުކުރަމުން ދަނިކޮށް އޭނާގެ ހަބަރު ހުސްވެފައިވާކަން ފާހަގަކުރެވުނެވެ.
މައްސަލައިގެ މެޑިކޯ-ލީގަލް ރިޕޯޓުގައި ކަންޗަންގެ މަރުގެ ސަބަބު ވަނީ "އަންނޯން" ކަމަށް ބަޔާންކޮށްފައެވެ. އަދި އޭނާއަށް އެއްވެސް ބާވަތެއްގެ ޖިންސީ އަނިޔާއެއް ލިބިފައިވާކަން ރިޕޯޓުން ފާހަގަކޮށްފައެއް ނުވެއެވެ. އޭނާއަކީ އެނީމިއާގެ މެޑިކަލް ހިސްޓްރީއެއް އޮތް މީހެއްކަންވެސް ފުލުހުން ވަނީ ހާމަކޮށްފައެވެ.
ސްޕޮންސަރގެ ފަރާތުން ހަށިގަނޑާ ހަވާލުނުވުމާ ގުޅިގެން، ފުލުހުންގެ ބެލުމުގެ ދަށުން ވަނީ އޭނާގެ ހަށިގަނޑު މޯޗަރީއަށް ގެންގޮސްފައެވެ. ފުލުހުން ބުނިގޮތުގައި މި މައްސަލައިގެ ތަހުގީގު ކުރިއަށްދަނީ ދެމެހެއްޓެނިވި ގޮތެއްގައެވެ.
