މިމަހުގެ 15 ވަނަ ދުވަހު ރާއްޖޭގެ ގެސްޓު ހައުސްތައް ހުޅުވައި ފަތުރުވެރިންނަށް ޚިދުމަތްދޭން ފަށާއިރު އުއްމީދީ ފައިދާއަށް ވާސިލުވުމުގެ ބިންގަލަކަށް ވާނީ އެއްބައިވަންތަކަމާއި ޒިންމާދާރުކަން ކަމުގައި ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވެއްޖެއެވެ.
ކޯވިޑް-19ގެ ސަބަބުން ރާއްޖޭގެ އިޤްތިޞާދަށާއި ފަތުރުވެރިކަމަށް ކުރިމަތިވެފައިވާ ހީނަރުކަމުން އަރައިގަތުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ކޯވިޑުގެ ބަލިމަޑު ކަމާއެކު ރާއްޖޭގެ ބޯޑަރުތައް ބަންދުކޮށްފައި އޮތުމަށްފަހު އަލުން ހުޅުވާލައި ރައްކާތެރިކަމުގެ ފިޔަވަޅުތަކާއެކު ފަތުރުވެރިންނަށް ރިސޯޓުތަކަށް އާދެވޭނެ މަހު ސަރުކާރުން ވަނީ ފަހިކޮށްދެއްވާފައެވެ.
ކޯވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ބޮޑެތި ގޮންޖެހުންތަކެއް ކުރިމަތިެފައިވާއިރު، ބޯޑަރުތައް ބަންދުކޮށް ދަތުރުފަތުރަށް އެޅުނު ހުރަސްތަކާއެކު ރިސޯޓުތަކުގެ އިތުރުން ލޯކަލް ޓޫރިޒަމުން ލިބޭ އާމްދަނީން ދިރިއުޅުމުގެ ކަންކަން ހަމަޖައްސަމުންދިޔަ އާއިލާތަކަށްވެސް ވަނީ ބޮޑެތި ދަތިތަކަކާއި ކުރިމަތިލާން ޖެހިފައެވެ.
މީހުން ދިރިއުޅޭ ރަށްތަކުގައި ހުންނަ ގެސްޓުހައުސްތަކުން ފަތުރުވެރިންނަށް ޚިދުމަތްދިނުމުގެ ހުއްދަ މިމަހުގެ15 ވަނަ ދުވަހު ދޭން ސަރުކާރުން ނިންމާފައިވަނީ ރައްކާތެރެިކަމުގެ ޚާއްޞަ ފިޔަވަޅުތަކަކާއި އެކުގައެވެ. އެގޮތުން އެޗްޕީއޭއިން ވަނީ މިކަމަށް ޚާއްޞަ ގައިޑްލައިނެއްވެސް އާންމުކޮށްފައެވެ.
އަންނަ ހަފްތާގައި ގެސްޓުހައުސްތަކުން ފަތުރުވެރިންނަށް ޚިދުމަތްދޭން ފަށަން ތައްޔާރުވަމުންދާއިރު ސިއްޙީގޮތުން ސަމާލުވެ ރައްކާތެރިވުމަށް އަންގާފައިވާ ގައިޑްލައިންތަކާ އެއްގޮތަށް ޚިދުމަތްދޭ ފަރާތްތަކުން އަމަލުކުރުން ވަރަށް މުހިންމެވެ. މިކަމާ ގުޅޭގޮތުން ޓޫރިޒަމް މިނިސްޓަރ ޢަބްދުﷲ މައުސޫމް ކުރެއްވި ޓުވީޓެއްގައި ވިދާޅުވެފައިވަނީ މިކަން ކާމިޔާބު ކުރެވޭނީ އެންމެންގެ އެއްބައިވަންތަކަމާއި ޒިންމާދާރުކަމާއެކުގައި ކަމަށެވެ.
ގެސްޓްހައުސްތައް މި މަހު 15 ގައި ހުޅުވަންފަށާ، އުއްމީދީ ފައިދާއަށް ވާސިލުވުމުގެ ބިންގަލަކީ އެއްބައިވަންތަކަމާއި ޒިންމާދާރުކަމެވެ. އެންމެން އަތުގުޅާލައި ފަރުވާތެރިކަން އިސްކޮށްގެން ތިޔަކުރައްވާ މިންނެތް މަސައްކަތުން އިރާދަފުޅުކުރެެއްވިއްޔާ މިކަން ކާމިޔާބު ކުރެވޭނެއެވެ.
— Abdulla Mausoom (@Mausoom_Maus) October 10, 2020
މިނިސްޓަރ ވިދާޅުވެފައިވާ ފަދައިން އާންމުން ދިރިއުޅޭ ރަށްތަކުގައި ފަތުރުވެރިންނަށް ޚިދުމަތްދޭން ފަށާއިރު މިކަމަކީ ޒިންމާދާރުކަމާއެކު ކުރުން ކޮންމެހެން މުހިން ކަމެކެވެ. އެންމެންގެ ރައްކާތެރިކަމަށްޓަކައި ކަނޑައަޅާފައިވާ ރައްކާތެރިކަމުގެ ގައިޑްލައިންތަކަށް އަމަލުކުރުން ވަރަށް މުހިންމެވެ.
