އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން މިއަދު ހައުސިން މިނިސްޓްރީއަށް 100 ޑަސްބިން ހަދިޔާކޮށްފިއެވެ.
މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގު ހަލީމް އެ ޑަސްބިންތައް ހަވާލުކޮށްދެއްވީ ހައުސިން މިނިސްޓަރ ޑރ. އަލީ ހައިދަރަށެވެ. އަދި މީގެއިތުރުން، އައިކެއާ އޮޕްޓިކަލްގެ ފަރާތުން ވެސް ވަނީ އެ މިނިސްޓްރީއަށް 100 ނޯޓް ފޮތް ހަދިޔާކޮށްފައެވެ.
މި މަހުގެ 12 ވަނަ ދުވަހު މާލޭގައި ހިނގި އަލިފާނުގެ ހާދިސާގައި ހައުސިން މިނިސްޓްރީއާއި އިންފްރާސްޓްރަކްޗާ މިނިސްޓްރީ ހިންގަމުންދިޔަ އިމާރާތް ވަނީ އެއްކޮށް އަނދައިގެން ގޮސްފައެވެ. އަދި އެ އިމާރާތާ އިންވެގެން ހުރި އެންވަޔަރަމެންޓް މިނިސްޓްރީގެ ވެސް ބޮޑުބައެއް ވަނީ ބޭނުން ނުކުރެވޭ ވަރަށް އަނދައިގެން ގޮސްފައެވެ. ގެއްލުންވި މިނިސްޓްރީތަކުގެ މަސައްކަތްތައް މިހާރު ވަނީ ދަރުބާރުގޭގައި ފަށާފައެވެ. އަދި ހައުސިން މިނިސްޓްރީން ވަނީ އައިޖީއެމްއެޗާއި އައިކެއާއިން ފޯރުކޮށްދިން އެހީތެރިކަމަށް ޝުކުރު އަދާކޮށްފައެވެ.
