ތަޢުލީމީ ވުޒާރާގެ 92 ވަނަ އަހަރީ ދުވަސް ފާހަގަކުރުމުގެ ގޮތުން ޚާއްޞަ ޙަފްލާއެއް ބާއްވައިފިއެވެ. މި ޙަފްލާގައި ވާހަކަފުޅު ދައްކަވަމުން މިނިސްޓަރ ޑރ. އިސްމާޢީލް ޝަފީޢު މުވައްޒަފުން ކުރައްވާ މަސައްކަތުގެ އަގު ވަޒަންކުރައްވައި، އެ ބޭފުޅުންނަށް ޝުކުރު އަދާކުރެއްވިއެވެ.
މިނިސްޓްރީގެ މަސައްކަތްތައް ރާއްޖޭގެ ކޮންމެ ރަށެއްގައި ހުންނަ ސްކޫލަކުންނާއި، ކޮންމެ ގެއަކުން ފެންނަން ހުންނާނެކަމަށް މިނިސްޓަރ ފާހަގަކުރެއްވިއެވެ. އަދި ދަރިވަރުންގެ އުނގެނުމުގެ ޙަރަކާތްތަކުގައި މިނިސްޓްރީގެ ހުރިހާ މުވައްޒަފުންގެވެސް އެއްބާރުލުން ވަރަށް ބޮޑަށް ލިބެމުންދާކަން ފާހަގަކުރެއްވިއެވެ. މީގެއިތުރުން، މުވައްޒަފުން އެއް ޓީމެއްގެ ގޮތުގައި މަސައްކަތްކުރުމުގައި ދެމިތިބުމަށް މިނިސްޓަރ އިލްތިމާސްކުރެއްވިއެވެ.
ދިވެހިރާއްޖޭގެ ތަޢުލީމީ ވުޒާރާގެ ތާރީޚަށް ބަލާއިރު، މި ވުޒާރާ އުފެދިފައިވަނީ 1932 ވަނަ އަހަރު، އޭރުގެ ރަސްގެފާނު އައްސުލްޠާން މުޙައްމަދު ޝަމްސުއްދީން (ތިންވަނަ) ސިރީ ކުލަ ސުންދުރަ ކައްތިރި ބޮވަނަ މަހާރަދުން ދިވެހިރާއްޖޭގެ ފުރަތަމަ ޤާނޫނު އަސާސީ އިޢުލާންކުރެއްވުމާ ގުޅިގެންނެވެ. ނަމަވެސް، މީގެ ކުރިން ވެސް ދިވެހި ދައުލަތުގެ ފަރާތުން ރަސްމީކޮށް ތަޢުލީމު ދިނުމުގެ މަސައްކަތް ކުރަމުން އައިސްފައިވާކަން ތާރީޚީ ލިޔެކިޔުންތަކުން އެނގެން އެބަހުއްޓެވެ.
