މިނިސްޓްރީ އޮފް ޓޫރިޒަމްގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، 2023 ވަނަ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1,969,071 އަށް އަރާފައިވެއެވެ.
މިއީ ފާއިތުވި އަހަރުގެ މި މުއްދަތާ އަޅާބަލާއިރު 9 އިންސައްތައިގެ ކުރިއެރުމެކެވެ. އަދި މިއީ 2022 ވަނަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 1,607,328 ފަތުރުވެރިންނާއި، 2023 ވަނަ އަހަރުގެ މި މުއްދަތުގައި ޒިޔާރަތްކުރި 1,806,500 ފަތުރުވެރިންނަށްވުރެ މަތީ އަދަދެކެވެ.
ސަރުކާރުގެ މިއަހަރުގެ އަމާޒަކީ ދިވެހިރާއްޖެއަށް 2 މިލިއަން ފަތުރުވެރިން ގެނައުން ކަމަށްވާއިރު، ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެފައިވަނީ މި މަހުގެ 26 ވަނަ ދުވަހު މިއަހަރުގެ 2 މިލިއަންވަނަ ފަތުރުވެރިޔާ ރާއްޖެއަށް ޒިޔާރަތްކުރާނެ ކަމަށް ލަފާކުރެވޭ ކަމަށެވެ. މިހާރު ސީޒަންގެ ތެރޭގައި ވުމާއެކު، ބައެއް ދުވަސްތަކުގައި 8,000 ފަތުރުވެރިން ރާއްޖެއަށް ޒިޔާރަތްކުރާނެ ކަމަށް ލަފާކުރެވޭ ކަމަށް މިނިސްޓަރު ވިދާޅުވެފައިވެއެވެ.
ސަރުކާރުން 2025 ވަނަ އަހަރަށް ހުށަހަޅާފައިވާ ދައުލަތުގެ ބަޖެޓުގައި، އަންނަ އަހަރު ރާއްޖެއަށް 2.2 މިލިއަން ފަތުރުވެރިން ޒިޔާރަތްކުރާނެ ކަމަށް ލަފާކޮށްފައިވެއެވެ. އަދި ފަތުރުވެރިކަމުގެ ބެޑް ނައިޓްސް 14.2 މިލިއަނަށް އަރާނެ ކަމަށް ލަފާކުރެވެއެވެ. މި ކުރިއެރުން ހާސިލުވާނެ ކަމަށް ބެލެވެނީ އަންނަ އަހަރު ހުޅުވުމަށް ހަމަޖެހިފައިވާ ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލްގެ ސަބަބުންނެވެ. 78,000 އަކަ މީޓަރުގެ މި އައު ޓާމިނަލްގެ ސަބަބުން އެއާޕޯޓުގެ އަހަރީ ކެޕޭސިޓީ 1.5 މިލިއަނުން 7 މިލިއަނަށް އިތުރުވެ، އެރޯބްރިޖާއި ޒަމާނީ ބެގޭޖް ހޭންޑްލިން ސިސްޓަމް ފަދަ ވަސީލަތްތައް ޤާއިމުކުރެވޭނެއެވެ.
