ކުއްލި ގޮތަކަށް ފިނޭންސް މިނިސްޓަރުކަމުން އިސްތިއުފާ ދެއްވި ޑރ. މުހައްމަދު ޝަފީގު ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)ގެ ޑިރެކްޓަރުންގެ ބޯޑަށް ހަމަޖައްސައިފި އެވެ.
ސަރުކާރު ހިއްސާވާ ކުންފުނިތަކުގެ ބެލެނިވެރި ފަރާތް، ޕީސީބީގެ ވެބްސައިޓުން ދައްކާ ގޮތުން ޝަފީގު އެޗްޑީއެފްސީގެ ބޯޑަށް އައްޔަންކޮށްފައި ވަނީ މި މަހު 2 ވަނަ ދުވަހު އެވެ.
ޝަފީގް ވަނީ މީގެ ކުރިން ވެސް އެޗްޑީއެފްސީގައި މަސައްކަތް ކުރައްވާފަ އެވެ. އެގޮތުން، މިނިސްޓަރަކަށް ވަޑައިގަތުމުގެ ކުރިން އޭނާ ހުންނެވީ އެ ކުންފުނީގެ ފައިނޭންސްގެ ހެޑްގެ މަގާމުގަ އެވެ.
ޝަފީގު ފިނޭންސް މިނިސްޓަރު ކަމުން އިސްތިއުފާ ދެއްވީ މިދިޔަ 30 ސެމްޓެމްބަރުގަ އެވެ. ހަމަ އެ ދުވަހު އެ މަގާމަށް ރައީސް މުހައްމަދު މުއިއްޒު ވަނީ އޭރު ފޮރިން މިނިސްޓަރުގެ މަގާމުގައި ހުންނެވި މޫސާ ޒަމީރު އައްޔަންކުރައްވާފަ އެވެ.
