އެމްޕީއެލްއާއި ހއ. އިހަވަންދޫ ކައުންސިލާ ދެމެދު އެ ރަށުގައި ޑޮކްޔާޑެއް ތަރައްގީކުރުމުގެ އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ ސީއީއޯ މުހައްމަދު ވަޖީހު އިބްރާހީމް އެވެ. އަދި އިހަވަންދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަހުމަދު ސޮބާހެވެ.
މި މަޝްރޫއުގެ ދަށުން ޑޮކްޔާޑު އެޅުމަށް އެއްލައްކަ އަކަފޫޓުގެ ބިމެއް 50 އަހަރުގެ މުއްދަތަށް އެމްޕީއެލްއަށް ދޫކުރެވޭނެއެވެ. އިހަވަންދޫ ކައުންސިލުން މަޢުލޫމާތު ދެއްވާގޮތުގައި މި ބިމަށް ކުލީގެ ގޮތުގައި އެއްވެސް ފައިސާއެއް ނުނެގޭނެއެވެ. އެމްޕީއެލްއިން ބުނާގޮތުގައި ޑޮކްޔާޑް އެޅުމުގެ މަސައްކަތް ކުރިއަށް އޮތް 6 މަސްދުވަހުގެ ތެރޭގައި ފެށޭނެއެވެ.
އެއްބަސްވުމުގެ ރަސްމިއްޔާތުގައި ވާހަކަފުޅު ދައްކަވަމުން ކައުންސިލަރު ސޮބާހު ވިދާޅުވި ގޮތުގައި މި ޑޮކްޔާޑާއެކު އިހަވަންދޫގެ ރައްޔިތުންނަށް ވަޒީފާގެ ފުރުސަތުތަކާއި އެމްޕީއެލްގެ ފަރާތުން ހިންގާ އެކިއެކި ކޯސްތަކުގައި ބައިވެރިވުމުގެ ފުރުސަތު ލިބިގެންދާނެއެވެ. އަދި މި އިންވެސްޓްމެންޓުން ރައްޔިތުންނަށް ލުއިފަސޭހަކަން ލިބިގެންދާނެކަމަށްވެސް އެމަނިކުފާނު ވިދާޅުވިއެވެ.
އިހަވަންދޫގައި ޑޮކްޔާޑެއް އެޅުމަކީ ބަންކަރިންގ ޚިދުމަތުގެ ތެރޭގައި ހިމެނޭ މަސައްކަތެކެވެ. މިގޮތުން، އިހަވަންދިއްޕޮޅު ނުވަތަ މޯލްޑިވްސް އިކޮނޮމިކް ގޭޓްވޭގައި އިންޓަނޭޝަނަލް ބަންކަރިންގ ފެސިލިޓީއެއް އެޅުމަށް އެސްޓީއޯއިން ނެދަލޭންޑްސްގެ ކުންފުންޏެއް ކަމަށްވާ "ވިޓޯލް"އާ އެކު މިދިޔަ މާޗު މަހު އެއްބަސްވުމެއްގައި ސޮއިކޮށްފައިވެއެވެ. ސަރުކާރުން ބުނާގޮތުގައި ރާއްޖެ އޮންނަ ސަރަހައްދުގެ ގޮތުން އިހަވަންދިއްޕޮޅު ކައިރިން ދުވާލަކު 300 އަށްވުރެ ގިނަ އާގު ބޯޓު ދަތުރުކުރެއެވެ.
