ސަރުކާރު ޒިންމާދާރު ކުރުމަށް އެހެން ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާ އެކު އެއްބަސްވެވޭ ހަމަތަކެއްގެ މަތިން މަސައްކަތް ކުރަން ދަ ޑިމޮކްރެޓްސްއިން ނިންމައިފިއެވެ.
ޑިމޮކްރެޓްސްގެ ނައިބު ރައީސް މުހައްމަދު ޝިފާޒް، ޑިމޮކްރެޓްސްގެ ނެޝަނަލް އެސެމްބްލީއަށް ހުށަހެޅުއްވި ގަރާރެއްގައި ބަޔާންކޮށްފައިވަނީ މި މަސައްކަތަކީ ސަރުކާރު ހަމަ މަގަށް އަޅުވައި ޒިންމާދާރު ކުރުމުގެ މަސައްކަތް އިތުރަށް ފުޅާ ކުރުމަށް ކުރެވޭ މަސައްކަތެއް ކަމުގައެވެ. އަދި މި ގަރާރުގައި ފާހަގަކޮށްފައިވާ ގޮތުގައި ޑިމޮކްރެޓްސްއަކީ ސަރުކާރުގައި ނުވަތަ އިދިކޮޅު ޕާޓީއެއްގެ ގޮތުގައި މަސައްކަތްކުރާ ޕާޓީއެއް ނަމަވެސް، ސަރުކާރުން ގަސްތުގައި އަދި އިހުމާލުން ރައްޔިތުންނާއި ދިވެހިރާއްޖެއަށް ބޭއިންސާފުވެ، ގެއްލުން ބޮޑު އެތައް ކަމެއް ތަކުރާރުކުރަމުންދާކަން ފާހަގަކޮށްފައިވެއެވެ.
މީގެއިތުރުން، ގަރާރުގައި ފާހަގަކޮށްފައިވާ ގޮތުގައި ސަރުކާރުން ދަނީ ގާނޫނު އަސާސީއިން ތަރުތީބުކޮށްފައިވާ ޑިމޮކްރެޓިކް ނިޒާމު ބަލިކަށިކޮށް، ދައުލަތުގެ މުވައްސަސާތައް ރައީސުލްޖުމްހޫރިއްޔާއަށް ކޮންޓްރޯލް ލިބޭ ގޮތަށް ބަދަލުކޮށް، ރައްޔިތުންގެ ބާރުވެރިކަން ގެއްލޭ ގޮތަށް ގާނޫނު އަސާސީއަށް ކުއްލި ބޮޑެތި ބަދަލުތައް ގެނެސް، ސަރުކާރު ޖަވާބުދާރީ ކުރުމުގެ ދޮރުތައް ބަންދުކުރަމުންނެވެ.
ޑިމޮކްރެޓްސްއިން މިފަދައިން ނިންމުމާއެކު، އެމްޑީޕީން ވެސް ވަނީ ވަކި އުސޫލެއްގެ ދަށުން އެހެން ސިޔާސީ ޕާޓީތަކާ އެކު ސަރުކާރު ޖަވާބުދާރީ ކުރުވުމަށް މަސައްކަތް ކުރަން ދާދި ފަހުން އިގުރާރުވެފައެވެ.
