މާލޭގައި ރޯމާ ދުވާލު އަންހެނެއްގެ ކަރުގައި އޮތް ފަށެއް ފޭރެން އުޅުނު މައްސަލައިގައި ބަންދުކުރެވުނު ފ. ފިޔަބަރިގެ ހަސަން އިސާމް (30 އަހަރު) ގެ ބަންދުގެ މުއްދަތު ފަސް ދުވަހަށް ޖަހައިފިއެވެ.
ފުލުހުން ބުނާ ގޮތުގައި އިއްޔެ ހައްޔަރުކުރެވުނު އިސާމްގެ ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރުކުރުމުން، ފަސް ދުވަހުގެ މުއްދަތަށް ބަންދުކުރުމަށް ނިންމާފައިވެއެވެ. އަދި މި މައްސަލައިގައި އިސާމް ދުއްވަން އިން ސައިކަލުވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުންގެ ތަރުޖަމާން މުހައްމަދު ޝިފާން ވިދާޅުވިއެވެ.
މި ހާދިސާގައި އިސާމް ސައިކަލު ދުއްވަމުން ގޮސް، ހަމަ ސައިކަލުގައި ދިޔަ އަންހެނަކާ އަރާ ހަމަކުރުމަށްފަހު އެ އަންހެން މީހާގެ ކަރުގައި އޮތް ފަށް ފޭރެން އުޅޭ މަންޒަރު ފެންނަ ވީޑިއޯ ސޯޝަލް މީޑިއާގައި މިހާރު ވަނީ ވައިރަލްވެފައެވެ. މީގެ އިތުރުން، އޭނާ ވަނީ އަންހެން މީހާގެ ދަބަސް ވެސް ފޭރެން މަސައްކަތްކޮށްފައެވެ. ނަމަވެސް އަންހެން މީހާ ކައިރީގައި ހުރި ގޯޅިތެރެއަށް ވަންނަން މަސައްކަތް ކުރުމާއި އަދި އެ ސަރަހައްދަށް މީހުން ޖަމާވާން ފެށުމުން، އިސާމްއަށް އެކަން ކާމިޔާބުވާ ގޮތް ނުވެ، ސައިކަލުގައި އެ ސަރަހައްދު ދޫކޮށް ގޮސްފައިވެއެވެ.
