ފެނާއި ނަރުދަމާގެ ޚިދުމަތް މެދުނުކެނޑި ފޯރުކޮށްދިނުމަށްޓަކައި ޒަމާނީ އާ ޓެކްނޮލޮޖީ ވަސީލަތްތައް އިތުރުކުރަމުންދާ ކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރު އަބްދުލް މަތީން މުހައްމަދު ވިދާޅުވެއްޖެއެވެ. އޭނާ މިހެން ވިދާޅުވީ ރޭ ސަލާހުއްދީން ސްކޫލުގައި ބޭއްވުނު އެމްޑަބްލިއުއެސްސީގެ މި އަހަރުގެ ސްޓާފް އެވޯޑް ނައިޓް ހަފްލާގައެވެ.
ކުންފުނީގެ މުވައްޒަފުންގެ ކުރިއެރުމާއި، ލާބައާއި މަންފާއަށް ވޭތުވެދިޔަ އަހަރު ގިނަ މަސައްކަތްތަކެއް ކޮށްފައިވާކަން ފާހަގަކުރެއްވި އެމްޑީ ވިދާޅުވީ، މުވައްޒަފުން ބިނާކުރުމަށް ކުރު އަދި ދިގު މުއްދަތުގެ ތަމްރީނު އަދި ސްކޮލަރޝިޕް ޕްރޮގްރާމްތަކުގެ ފުރުސަތު ފަހިކޮށްދީފައިވާ ކަމަށެވެ. އަދި މުވައްޒަފުންގެ ދުޅަހެޔޮކަމާއި، ސިއްހަތާއި ވަޒީފާގެ މާހައުލުގައި ހިތްހަމަޖެހުން އަށަގެންނެވުމަށްވެސް މަސައްކަތްތަކެއް ކުރެވިފައިވާ ކަމަށް އެމްޑީ ފާހަގަކުރެއްވިއެވެ.
ފެނާއި ނަރުދަމާގެ ޚިދުމަތަކީ ކޮންމެ ރައްޔިތެއްގެ ދިރިހުރުމާއި ގުޅިފައިވާ އަސާސީ ޚިދުމަތެއްކަން ފާހަގަކުރެއްވި އެމްޑީ އިތުރަށް ވިދާޅުވީ، މި ޚިދުމަތް މެދުކެނޑުމެއްނެތި ފޯރުކޮށްދިނުމަށް ޒަމާނީ އާ ޓެކްނޮލޮޖީއާއި ވަސީލަތްތައް އިތުރުކޮށް، ޚިދުމަތްތައް އިތުރަށް ތަރައްގީކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. އަދި ސަރުކާރުން އެމްޑަބްލިއުއެސްސީއާ ހަވާލުކޮށްގެން ކުރިޔަށް ގެންދާ ގިނަ މަޝްރޫޢުތަކުގެ މަސައްކަތްތައް ނިމި، އިތުރު މަޝްރޫޢުތަކުގެ މަސައްކަތްތައްވެސް މެދުނުކެނޑި ކުރިޔަށްދާކަމަށް އެމްޑީ ވަނީ ފާހަގަކުރައްވާފައެވެ. ހަފްލާގައި އެމްޑީ ވަނީ ކުންފުނީގެ މުވައްޒަފުންގެ ހުނަރާއި ބުރަ މަސައްކަތް ފާހަގަކުރައްވައި ހިތްވަރު ދެއްވާފައެވެ.
