ޣައިރުދީންތަކުގެ އީދުތައް ފާހަގަކުރުމުގައި ބައިވެރިވުމަކީ ހަރާމްކަމެއް ކަމުގައި އިއްޔެގެ ހުކުރު ހުތުބާގައި ވިދާޅުވެއްޖެއެވެ. އިސްލާމްވަންތަކަމާއި ދީނީ ޝަޚުސިއްޔަތު ދެމެހެއްޓުމަކީ އިސްލާމީ ޝަރީޢާގެ ތެރޭގައި ހިމެނޭ ކަމެއްކަމަށް ބަޔާންކުރަމުން، މުސްލިމުން ޣައިރުދީންތަކުގެ މީހުންނާ އެއްގޮތަށް އުޅެގެން ނުވާނެކަމަށް ހުރިހާ ދަންނަބޭކަލުން އެއްބަސްވެވަޑައިގަންނަވާކަން ހުތުބާގައި ވަނީ ފާހަގަކޮށްފައެވެ.
މުސްލިމުން ނަކަލު ނުކުރަންވީ ކަންކަމުގެ ތެރޭގައި އަގީދާގެ ކަންކަމާއި އަޅުކަމުގެ ކަންކަމާއި އަދި އަހުލާގުގެ ކަންކަންވެސް ހިމެނޭކަމަށް ހުތުބާގައި ބަޔާންކޮށްފައިވެއެވެ. އަދި އަޅުކަމުގެ ގޮތުން ކުރެވޭ ކަންކަމުގައި އެހެން ބަޔަކު ކޮޕީކުރުމަކީ ނުވަތަ އެހެން ބަޔަކާ އެއްގޮތަށް އަމަލުކުރުމަކީ އިސްލާމީ އުންމަތުގެ ޝަހުސިއްޔަތު ފުނޑުފުނޑުވެ، އިސްލާމްދީނުގެ އަމިއްލަވަންތަކަން ގެއްލޭނެ ކަމެއްގެ ގޮތުގައި ފާހަގަކޮށްފައިވެއެވެ.
ހުތުބާގައި ވަކިން ޚާއްޞަކޮށް ފާހަގަކޮށްފައިވަނީ މުސްލިމުން ކްރިސްމަސް ފާހަގަކުރުމާއި މި އިޙުތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއް ނޫންކަމަށެވެ. މީގެ ތެރޭގައި ކްރިސްމަސްގަހާއި ސެންޓާ ކްލައުސް ފަދަ ނަޞާރާއިން އެމީހުންގެ ދީނަށް ނިސްބަތްކޮށް ކުރާ ކަންތައްތައް ހިމެނޭކަމަށް ބުނެފައިވެއެވެ.
އިލްމުވެރިންގެ ބަސްފުޅުތަކަށް ހަވާލާދެމުން ބުނެފައިވަނީ މުސްލިމުން ޣައިރު މުސްލިމުންގެ ދީނީ ޝިއާރުތަކަށް ތަބާވުމަކީ ކަނޑައެޅިގެން ހަރާމް ކަމެއްކަމަށެވެ. މީގެ ތެރޭގައި އެމީހުންގެ އީދުތައް ފާހަގަކުރުމާއި އެކަމުގައި ބައިވެރިވެ ތަހުނިޔާކިޔުން ހިމެނޭކަމަށް ވަނީ ބަޔާންކޮށްފައެވެ. އަދި ހާއްސަކޮށް މިފަދަ އަމަލުތަކުން ރާއްޖޭގެ މުޖުތަމަޢުތައް ސަލާމަތްވާންޖެހޭނެ ކަމަށްވެސް ހުތުބާގައި ބުނެފައިވެއެވެ.
