ހައުސިން މިނިސްޓްރީގެ އިސް މުވައްޒަފުން ހިމެނޭހެން 9 މުވައްޒަފަކު ސަސްޕެންޑް ކޮށްފައިވާކަމަށް މަޢުލޫމާތު ލިބިފައިވެއެވެ. މި މުވައްޒަފުންގެ ތެރޭގައި ޑެޕިއުޓީ މިނިސްޓަރުންނާއި ސީނިއަރ ޕޮލިޓިކަލް ޑިރެކްޓަރުން ހިމެނެއެވެ. ނަމަވެސް މުވައްޒަފުން ސަސްޕެންޑް ކުރި ސަބަބެއް އަދި ހާމަކޮށްފައެއް ނުވެއެވެ.
މި ސަސްޕެންޝަންތަކާ ގުޅިގެން ފުލުހުން ދަނީ "ބިންވެރިޔާ" ސްކީމްގެ ދަށުން ގޯތި ނުލިބޭ ބަޔަކަށް، ގަވާއިދާ ޚިލާފަށް އެޗްޑީސީން ހުޅުމާލެއިން ގޯތި ދިން މައްސަލައިގެ ޖިނާއީ ތަޙުޤީޤެއް ކުރަމުންނެވެ. މި މައްސަލައިގައި ޑޮކިއުމަންޓް ފޯޖުކުރިކަމުގެ ތުހުމަތުތަކެއް ކުރެވެއެވެ.
ސެންޓްރަލް އިންވެސްޓިގޭޝަން ކޮމާންޑުގެ ވެރިޔާ، އޭސީޕީ ޢަބްދުﷲ ޝަރީފް ވިދާޅުވި ގޮތުގައި ޕްރޮސެކިއުޓަރ ޖެނެރަލްގެ އޮފީހުން ވަނީ "ބިންވެރިޔާ" އަދި "ގެދޮރުވެރިޔާ" ސްކީމްތަކުގައި މަޤާމުގެ ނުފޫޒު ބޭނުންކޮށްގެން އެއްވެސް ކަމެއް ހިންގާފައިވޭތޯ ބެލުމަށް ފުލުހުންނާއި އޭސީސީއަށް އަމުރުކޮށްފައެވެ.
މި މައްސަލައިގައި އެޗްޑީސީގެ ބޯޑު މެންބަރުންވެސް ވަނީ ސަސްޕެންޑް ކުރެވިފައެވެ. އަދި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ފަޒީލް ރަޝީދުވެސް ވަނީ ހުރިހާ ޒިންމާތަކަކުން ވަކިކޮށް ސަސްޕެންޑް ކުރެވިފައެވެ. ސޯޝަލް މީޑިއާގައި ދައުރުވާ ލިސްޓެއްގައި ފަޒީލްގެ ނަން ހިމެނެނީ ޝަރުޠު ހަމަނުވި ނަމަވެސް ގޯތި ލިބުނު ފަރާތްތަކުގެ ތެރޭގައެވެ. އޭނާއަކީ އެޗްޑީސީގެ އެމްޑީ އިބްރާހިމް ފަޒުލް ރަޝީދުގެ ބޭބެއެވެ.
މި މައްސަލަ ބެލުން ލަސްވި ސަބަބާމެދު ސުވާލު އުފައްދައި، ޒިންމާވާންޖެހޭ ފަރާތްތަކާމެދު ފިޔަވަޅު އެޅުމަށް އެމްޑީޕީން ވަނީ ގޮވާލާފައެވެ.
