ބިންވެރިޔާ ސްކީމުން ގޯތި ހައްގު ނޫން ފަރާތްތަކަށް ގޯތި ދިން ކަމަށް ތުހުމަތުކުރެވޭ މައްސަލައިގެ ތަހުގީގާ ގުޅޭ އެއްވެސް ހެއްކެއް ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)އިން ނައްތާލިކަން މިހާތަނަށް ފާހަގަކުރެވިފައި ނުވާކަމަށް ފުލުހުން ބުނެފިއެވެ.
އަދި ތިން މިނިސްޓްރީއެއް ހިންގަމުންދިޔަ އިމާރާތުގައި މިދިޔަ ހަފުތާގައި ހިނގި އަލިފާނުގެ ހާދިސާއާ މި މައްސަލައާ ދެމެދު ގުޅުމެއް ނެތް ކަމަށްވެސް ފުލުހުން ވަނީ ހާމަކޮށްފައެވެ.
ފުލުހުން މިކަން ހާމަކުރީ، އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދު ހިމެނޭގޮތަށް ނުހައްގުން ގޯތި ދިން ކަމަށް ތުހުމަތުވާ މައްސަލައިގައި ފުލުހުން ފަށާފައިވާ ޖިނާއީ ތަހުގީގާ ގުޅޭގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައެވެ.
ސޯޝަލް މީޑިއާގައި ތުހުމަތުކުރެވޭ ގޮތުގައި ހައުސިން މިނިސްޓްރީ ހިންގަމުންދިޔަ އިމާރާތުގައި ރޯވި ހާދިސާއަކީ ބިންވެރިޔާ ސްކީމާ ގުޅޭ ކޮރަޕްޝަނުގެ އަމަލުތަކެއް ފޮރުވުމަށް ގަސްތުގައި ރޯކޮށްލި ހާދިސާއެކެވެ. އަދި ހުޅުމާލެ ބަލަހައްޓާ އެޗްޑީސީން ނުހައްގުން ގޯތިތައް ދޫކުރުމަށްފަހު، މި މައްސަލައިގެ ތަހުގީގު ފެށުމާ ގުޅިގެން ހެކިތައް ނައްތާލަން މަސައްކަތްކުރި ކަމަށްވެސް ތުހުމަތުކުރެވެއެވެ.
މި ތުހުމަތުތަކާ ގުޅޭގޮތުން ނޫސްވެރިން ކުރި ސުވާލުތަކަށް ޖަވާބުދެއްވަމުން އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވިދާޅުވީ، އަލިފާނުގެ ހާދިސާއާއި އެޗްޑީސީއާ ދެމެދު މިހާތަނަށް އެއްވެސް ގުޅުމެއް ފެނިފައިނުވާ ކަމަށެވެ. އަދި ތަހުގީގަށް ބޭނުންވާ އެއްވެސް ލިޔެކިޔުމެއް ނުލިބޭނެކަމަށްވެސް މިހާތަނަށް ފާހަގަކުރެވިފައިނުވާ ކަމަށާއި، އެޗްޑީސީން ހެކި ނައްތާލުމުގެ އެއްވެސް ކަމެއް ހިންގާފައިވާކަން ފާހަގަކުރެވިފައިނުވާ ކަމަށެވެ. އޭނާ އިތުރަށް ވިދާޅުވީ މިހާތަނަށް ބޭނުންވި ހުރިހާ މަޢުލޫމާތެއް ލިބިފައިވާ ކަމަށެވެ.
އިއްޔެ ފުލުހުން ވަނީ މި މައްސަލައިގެ ތަހުގީގުގެ ތެރެއިން އެޗްޑީސީއަށް ވަދެ ބަލައި ފާސްކޮށްފައެވެ. އަދި މިއަދު ޕޮލިސް ކޮމިޝަނަރު އަލީ ޝުޖާއު ވަނީ މި މައްސަލައިގެ ތަހުގީގު ކުރިއަށްގެންދާނެ ގޮތާ ގުޅޭގޮތުން އެންޓި ކޮރަޕްޝަން ކޮމިޝަން (އޭސީސީ)އާ ބައްދަލުކޮށް މަޝްވަރާކުރައްވާފައެވެ. ޕްރޮސެކިއުޓަރ ޖެނެރަލް އައްބާސް ޝަރީފް ވަނީ ބިންވެރިޔާގެ އިތުރުން ގެދޮރުވެރިޔާގެ މައްސަލައިގެވެސް އަވަސް ތަހުގީގެއް ހިންގައި، އެކަމާ ގުޅޭ މަޢުލޫމާތު ކޮންމެ ހަފުތާއަކު އެއްފަހަރު ހިއްސާކުރުމަށް އަމުރުކުރައްވާފައެވެ.
