ދިވެހިރާއްޖެއަށް އެތެރެވުމަށް ވިސާ ފީއެއް ނަގާކަމަށް ބުނެ ފަތުރުވެރިންނަށް އޮޅުވާލައިގެން ފައިސާ ނެގުމުގެ ސްކޭމެއް ހިންގަމުންދާތީ، އެކަމާމެދު ސަމާލުވުމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް (މަޓާޓޯ) އިން އިލްތިމާސްކޮށްފިއެވެ.
މަޓާޓޯއިން އެކްސްގައި ހާމަކުރި ގޮތުގައި، މި ސްކޭމް މައިގަނޑު ގޮތެއްގައި ހިންގަމުންދަނީ "މޯލްޑިވްސް-އެންޓްރީމާލެ.ކޮމް" މި ނަމުގައި ހިންގާ ވެބްސައިޓަކުންނެވެ. އެހެންނަމަވެސް އިތުރު ވެބްސައިޓުތަކުން މިފަދަ ސްކޭމްތައް ހިންގުމުގެ ފުރުސަތު އޮތުމާއެކު، އެކަމަށް ވެސް ސަމާލުވުމަށް މަޓާޓޯއިން ވަނީ އާންމުންނަށް ގޮވާލާފައެވެ. މަޓާޓޯއިން ސާފުކޮށް ބަޔާންކޮށްފައިވާ ގޮތުގައި ރާއްޖެއަށް އެތެރެވުމަށް އެއްވެސް ދައުލަތުގެ މުއައްސަސާއަކުން ވިސާ ފީއެއް ނުނަގައެވެ.
⚠️ Caution Notice
There is NO VISA FEE for tourists to enter Maldives.
BEWARE of fraudulent websites. pic.twitter.com/j9nGU0B02b
— MATATO – PATA Maldives Chapter (@matatoMV) December 18, 2024
މި މައްސަލައާ ގުޅިގެން މަޓާޓޯއިން ވަނީ ޓޫރިޒަމް މިނިސްޓަރ އިބްރާހިމް ފައިސަލަށް ސިޓީއެއް ފޮނުވާފައެވެ. މި ސިޓީގައި ބަޔާންކޮށްފައިވާ ގޮތުން، މި ސްކޭމް ހިންގާ ފަރާތްތަކުން ފަތުރުވެރިންގެ އަތުން ފައިސާ ނަގަމުންދަނީ އެ ވެބްސައިޓަކީ ރާއްޖެއަށް ޒިޔާރަތްކުރާ ފަތުރުވެރިންނަށް ރަސްމީކޮށް ހުއްދަ ދޫކުރާ ނިޒާމެއްގެ ގޮތުގައި ދައްކައިގެންނެވެ. އަދި ރާއްޖޭގެ އިމިގްރޭޝަންގެ ޓްރެވަލް ޑިކްލަރޭޝަން ފަސޭހަކޮށްދޭ ކަމަށްވެސް އެފަރާތްތަކުން ދަނީ ދޮގު މަޢުލޫމާތު ފަތުރަމުންނެވެ. މިހާތަނަށް މި ސްކޭމްގެ ޝިކާރައަކަށްވެ، އެކި ފަރާތްތަކުން ވަނީ މިކަން ރިޕޯޓުކޮށްފައެވެ.
މި ސްކޭމްގެ ސަބަބުން ރާއްޖޭގެ ފަތުރުވެރިކަމުގެ ސިނާޢަތަށް ނޭދެވޭ އަސަރުތަކެއް ކޮށްފާނެކަމުގެ ކަންބޮޑުވުން ފާޅުކޮށް، މި މައްސަލަ އިމިގްރޭޝަނާއި ފުލުހުންނާ ގުޅިގެން ތަޙްޤީޤު ކުރުމަށް މަޓާޓޯއިން ވަނީ އެދިފައެވެ. އަދި މިފަދަ ކަންކަން ހުއްޓުވުމަށްޓަކައި ފަތުރުވެރިންގެ މެދުގައި ހޭލުންތެރިކަން އިތުރުކުރުމުގެ ކެމްޕޭނެއް ކުރިއަށް ގެންދިއުމަށްވެސް މަޓާޓޯއިން ވަނީ ހުށަހަޅާފައެވެ.
